ShQO: 658-shi shaqyrymdaǵy turǵyn úıde órt kezinde gaz ballony jaryldy, zardap shekkender bar
ÓSKEMEN. 17 sáýir. QazAqparat - «652-shi shaqyrym» eldimekeninde tórt páterli úıdegi úsh bólmeli baspana órtke oranyp, dálizde turǵan gaz ballony jaryldy.
Eki adam aýyr zardap shekti.
48 jastaǵy er adam bastyń, moıynnyń, keýdeniń, aıaq-qoldyń, joǵarǵy tynys joldarynyń tereń dárejeli kúıik jaraqattaryn aldy. Onyń denesiniń 40 paıyzdan astamy kúıikke shaldyqqan.
Zardap shekken 24 jastaǵy áıel aýyr dárejede ysty gazǵa ýlanǵan. Olardyń ekeýi de Semeı qalasynyń jansaqtaý bólimine jetkizildi.
TJD mamandarynyń aıtýynsha, órt týraly habar «101» qyzmetine úıdiń turǵyndarynan tústi. Qutqarýshylar kelgenshe (eń jaqyn órt sóndirý bólimine deıin 14 shaqyrym) kórshiler zardap shekkenderdi taza aýaǵa shyǵarǵan.
Órt sóndirýshiler oqıǵa ornyna jetkende úıdiń barlyq aǵash qurylystary jalyndap jatty. Otty aýyzdyqtaýmen 10 maman aınalysty. Búginde tergeý jumystary qolǵa alynyp, keltirilgen shyǵyn men kináliler anyqtalý ústinde.
ShQO TJD málimetine qaraǵanda, jyl basynan beri óńirde 28 adam qyzyl jalynnyń qurbany boldy.
