ShQO: 3,5 mln teńge qaryzy bar adam Almaty oblysynan tabyldy

ÓSKEMEN. QazAqparat – Shyǵys Qazaqstan oblysynda 3,5 mln teńge qaryzy bar 60 jastaǵy er adam Almaty oblysy aýmaǵynan tabyldy, dep habarlaıdy QazAqparat tilshisi.

Semeı qalasy Polıtsııa basqarmasynyń kóshi-qon qyzmeti bólimine jeke sot oryndaýshysynan qaýly kelip tústi. Onda jazylǵandaı, 60 jastaǵy er adam bıznes seriktesinen 3 500 000 teńge qaryz alyp, qaıtarmaı qoıǵan.

«Boryshkerge izdeý jarııalaǵannan keıin kóshi-qon qyzmetiniń ókilderi 4 kún ishinde onyń Almaty oblysynda turyp jatqandyǵyn anyqtady. Endi qaryzdy óndirip alýmen sot oryndaýshylary aınalysýda», - dep habarlady ShQO Polıtsııa departamentiniń baspasóz qyzmeti.

Osy rette, kóshi-qon qyzmeti atqarý qujatyn oryndamaǵandarǵa QR ÁQBtK-niń 669-baby boıynsha ákimshilik jaýapkershilik jáne QR QK-niń 139-babyna sáıkes qylmystyq jaýapkershilik kózdelgenin eskertedi.