ShQO: 2023 jyly memleketke 120 myń gektar jer qaıtarylyp, 7 mekteptiń qurylysy bastalmaq
Shyǵys Qazaqstanda aýyl sharýashylyǵy salasynda 2023 jylǵa josparlanǵan jumystar jaıly oblystyq Aýyl sharýashylyǵy basqarmasy basshysynyń mindetin atqarýshy D. Jylqaıdarova aıtyp berdi.
«Aldaǵy jyly aýyl sharýashylyǵynda óndirilgen óniminiń jalpy kólemi 601,1 mlrd teńgeni quraıdy dep kózdelýde. Agroónerkásiptik keshende 75 jumys ornyn qura otyryp 58,6 mlrd teńgege 14 iri ınvestıtsııalyq joba iske asyrylmaq. Onyń ishinde ósimdik sharýashylyǵynda – 1,4 mlrd teńgege 2 joba, mal sharýashylyǵynda – 37 mlrd teńgege 7 joba, qaıta óńdeýde – 20,2 mlrd teńgege 5 joba», - deıdi ol.
ShQO Jer qatynastary basqarmasynyń málimetinshe, oblys ákiminiń orynbasary E.Nurbaevtyń 2022 jylǵy 15 jeltoqsandaǵy qaýlysymen bekitilgen josparǵa sáıkes, 2023 jyly Shyǵys Qazaqstan oblysynda paıdalanylmaı jatqan 120 myń gektar aýyl sharýashylyǵy jerlerin memleket menshigine qaıtarý josparlanýda.
Al oblystyq Densaýlyq saqtaý basqarmasy 2 dárigerlik ambýlatorııa salynatyndyǵynan habardar etti. Olar Glýbokoe aýdany Verh-Berezovka jáne Praporşıkov aýyldarynda ornalaspaq.
«Oblysta týberkýlezden, qan aınalymy júıesi aýrýlarynan jáne qaterli isikterden bolatyn syrqattanýshylyq pen ólim-jitim azaıýda. Medıtsınalyq kómektiń joǵary tehnologııalyq túrleri engizilýde, solardyń nátıjesinde patsıentke tezirek ońalýyna jáne qalpyna kelýine múmkindik jasalýda. Osy jyly oblystyń medıtsınalyq mekemelerine 9 rentgen apparaty, 3 mammografııalyq apparat, aýdandyq bosandyrý qyzmetteri úshin 143 jáne emhanalar úshin 146 jabdyq satyp alyndy. Aldaǵy úsh jyl ishinde aýdandyq aýrýhanalarǵa 6 kompıýterlik tomografııa jáne 602 basqa medıtsınalyq jabdyqtar alynbaq. Oblystyq onkologııalyq ortalyqta jaqyn arada onkologııalyq aýrýlardy erte dıagnostıkalaý úshin PET-KT paıda bolady, - deligen aqparatta.
ShQO Bilim basqarmasynyń habarlaýynsha, 2023 jyly birqatar mektep salynyp, keıbir qala, aýdandarda bilim nysandarynyń qurylysy bastalady.
«Atap aıtqanda, Óskemen qalasy «Nurly jol» shaǵyn aýdanyndaǵy 600 oryndyq mektep paıdalanýǵa beriledi. Zaısan qalasy «Saýyr» shaǵyn aýdanyndaǵy 300 oryndyq mekteptiń qurylysy aıaqtalady. Tarbaǵataı aýdany Sheńgeldi aýylynda 100 oryndyq mektep salynady. «Jaıly mektep» Ulttyq pılottyq jobasy aıasynda Óskemen qalasy 19-turǵyn aýdanynda 600 oryndyq mekteptiń qurylysy bastalmaq. Bilim ordasy 2024 jylǵa qaraı paıdalanýǵa beriledi dep josparlanǵan», - delingen málimette.
Budan bólek, atalǵan joba aıasynda Óskemen qalasy 19-turǵyn aýdanyndaǵy Ývalıev kóshesinde 600 oryndyq mekteptiń, Tımofeev kóshesinde 300 oryndyq mekteptiń, Rıdder qalasy Kırov kóshesinde 600 oryndyq mekteptiń, Shemonaıha qalasynda 300 oryndyq mekteptiń, Glýbokoe aýdany Beloýsovka kentinde 300 oryndyq mekteptiń, Opytnoe pole aýylynda 300 oryndyq mekteptiń qurylysy bastalady. Barlyq mektepterdiń qurylysy 2024 jyly aıaqtalady dep kózdelýde.
Kóptildi bilim berýdi damytýǵa da erekshe kóńil bólinýde. Osy jyly orys tilinde oqytatyn mektepterde qazaq tilin oqytý sapasyn arttyrýǵa basymdyq berilgen. 400 muǵalim kýrstyq daıyndyqtan ótti. Endi aýyzeki qazaq tiliniń deńgeıin arttyrý úshin tildik ortaǵa tolyq enip, ana tilinde sóıleıtinderdiń otbasylarynda turatyn jazǵy taqyryptyq lagerler uıymdastyrý josparlanýda.
«Talapkerler úshin oblystyń joǵary oqý oryndary men kolledjderine túsý múmkindikteri keńeıtilýde. Jyl saıyn granttar sany oblystyq bıýdjet esebinen 10%-ǵa artady. Qala syrtyndaǵy stýdentterdiń ómir súrý jaǵdaılary jaqsaryp, jataqhanalar salynýda.
Qosymsha bilim berý-balalardy damytýdyń keń quraly. Oqýshylar oblystyń sporttyq jáne mádenı is-sharalaryna belsendi qatysady. Búginde 4000-ǵa jýyq bala tegin sport sektsııalaryna qatysady. Osy jyldyń sáýir aıynda aımaqta ústel tennısi ortalyǵy iske qosyldy», - delingen habarlamada.
ShQO Kásipkerlik jáne ındýstrııalyq-ınnovatsııalyq damý basqarmasy da keler jyldaǵy negizgi jospardan habardar etti.
«Biryńǵaı ındýstrııalandyrý kartasy aıasynda 2023 jyly 117 mlrd teńgege iri joba iske asyrylady. Sonyń aıasynda «Eco MeatVostok» jeke kompanııasy Shyǵys Qazaqstan oblysynda et óndirý keshenin salady. Osylaısha, jem zaýyty, qýattylyǵy 3500 shoshqa ósirýge jetetin 3 shoshqa sharýashylyǵy kesheni boı kóteredi. Investıtsııanyń jalpy kólemi 117 mlrd teńgeni quraıdy», - delingen usynylǵan aqparatta.
Týrızmge qatysty aıtar bolsaq, óńirde osy salaǵa basa mán berilýde. Mundaǵy jurttyń kóp aǵylatyn jerleri – Buqtyrma sý qoımasy, Katonqaraǵaı Ulttyq saıabaǵy men taý-shańǵy klasteri. Oblys ákimi Danıal Ahmetovtyń aıtýynsha, Jańa Buqtyrma jaǵalaýy týrıstik ortalyqqa aınalmaq. Onda saýyqtyrý ortalyqtary kóptep ashylyp, qoǵamdyq tamaqtaný oryndary da boı kótermek.
«Osy jospar iske asyrylatyn bolsa, bul jaqqa ár jaqtan aǵylyp kelýshiler qatary da kúrt artady dep kútilýde. Jańa jumys oryndary ashylyp, júgirý jolaqtary, velosıpedpen júrýge arnalǵan jerler de paıda bolady. Balalar alańy qoldanysqa berilip, sý qoımasynyń janynda mýnıtsıpaldyq jaǵalaý jumysyn bastaıdy», - deıdi ol.
Sonymen qatar óńirde 2027 jylǵa qaraı ınternet pen uıaly baılanys jelisi múlde joq 117 aýyldy sapaly ǵalamtormen qamtamasyz etý josparlanyp otyr.
Tıisti jumystar 2023 jyly bastalmaq.
«Jumys eki kezeńde júzege asyrylady. Birinshi kezeńde 100-den astam halqy bar aýyldardan bastasaq, ekinshisinde 100-den az turǵyny bar aýyldardy qamtımyz. 2023 jylǵa jalpy somasy 1,3 mlrd teńgege 19 antennalyq-machtalyq qurylys salý kózdelýde», - deıdi oblys ákiminiń birinshi orynbasary Almashan Smatlaev.
Onyń aıtýynsha, aýyldardaǵy jobalyq-smetalyq qujattamalar daıyndalǵan soń antennalyq-machtalyq qurylystardy salý jumystary jalǵasyp, uıaly baılanys operatorlarymen kelisimshart jasalady.
