Shkafta jasyrylǵan bylyǵym joq - jańa Energetıka vıtse-mınıstri

ASTANA. QazAqparat -  QR Energetıka vıtse-mınıstri bolyp taǵaıyndalǵan Suńǵat Esimhanov arnaıy tekserýden ótpegendigin aıtty, dep habarlaıdy QazAqparat tilshisi.

«Arnaıy tekserý bolǵan joq, bul standartty protsedýra. Úkimet Qaýlysymen osy laýazymǵa taǵaıyndalyp otyrmyn.  Bylyqqa keler bolsam, menińshe energetıka salasy turaqty jumys istep tur. Shkafta jasyrylǵan eshqandaı bylyqtyń joqtyǵyna senimdimin. Jumys isteımiz, jalǵastyramyz», - dedi ol Úkimet otyrysynan keıin BAQ ókilderiniń saýalyna oraı.

Aıta keteıik, QR Úkimetiniń Qaýlysymen Esimhanov Suńǵat Qýatuly Energetıka vıtse-mınıstri bolyp taǵaıyndaldy.

Osyǵan deıin bul laýazymda bolǵan Anatolıı Shkarýpa óz ótinishimen qyzmetinen bosatyldy.

Eske salaıyq, QR Energetıka mınıstriniń burynǵy orynbasary A.Shkarýpa, «Turǵyn úı-kommýnaldyq sharýashylyqty damytý qory» AQ-nyń burynǵy basqarma tóraǵasy mindetin atqarýshy Qaısar Baıdaly jáne «ENERCO» JShS dırektory Erlan Nábıev sot sanktsııasymen tutqyndaldy.

Olarǵa Qaraǵandy oblysynyń Saran qalasyna jylý esepteýish aspaptardy satyp alyp, ornatý úshin «Turǵyn úı-kommýnaldyq sharýashylyqty damytý qory» aktsıonerlik qoǵamyna bıýdjetten bólingen qarajattardy jymqyrdy degen kúdik keltirilýde. Saran qalasynda jylý trassasy men ortalyq qazandyq joq bolsa da, Qor «ENERCO» jaýapkershiligi shekteýli seriktestigine 215 mıllıon teńge qarajatty zańsyz aýdarǵan. Jymqyrylǵan qarajattar jalǵan kásiporyn arqyly qolma-qol aqshaǵa aınaldyrylyp, qylmys qatysýshylarynyń arasynda bólingen.