Іshki týrızmdi qoldaý: memleket kásipkerlerge jeti baǵyt boıynsha ótemaqy men sýbsıdııa beredi
ASTANA. KAZINFORM – Qazaqstanda ishki jáne kelý týrızmin damytý maqsatynda bızneske memlekettik qoldaýdyń jeti tetigi qarastyrylǵan. Bul týraly Týrızm jáne sport mınıstrliginiń baspasóz qyzmeti habarlady.
Mınıstrliktiń málimetinshe, memlekettik qoldaý týrıstik ónimderdiń sapasyn arttyrýǵa, týrıstik ınfraqurylymdy jaqsartýǵa jáne kásipkerlerdiń shyǵyndaryn azaıtýǵa baǵyttalǵan.
Taý shańǵysy kýrorttaryna arnalǵan tehnıka men jabdyqtarǵa sýbsıdııa
Aspaly joldar, qar tazalaý tehnıkasy, jasandy qarmen qamtamasyz etýge arnalǵan qurylǵylar satyp alynǵan jaǵdaıda shyǵynnyń 25%-y óteledi.
Jol boıyndaǵy servıs nysandaryna jumsalǵan shyǵyndardy óteý
Motelder, janarmaı quıý stantsııalary, qoǵamdyq tamaqtaný oryndary, dárihanalar men ózge de qyzmet kórsetý nysandary qurylysyna ketken shyǵynnyń 10%-y memleket esebinen óteledi.
Týrıstik nysandardy salý nemese jańǵyrtý shyǵyndaryn sýbsıdııalaý
Týrısterge qyzmet kórsetýge arnalǵan jańa nysandardyń nemese qaıta jańǵyrtylatyn obektilerdiń qurylysyna jumsalǵan shyǵyndardyń 10%-y sýbsıdııalanady.
Týrıstik avtobýstar satyp alýǵa ótemaqy tóleý
Syıymdylyǵy 8 orynnan asatyn (júrgizýshini qospaǵanda) avtobýstardy satyp alý shyǵyndarynyń 25%-y óteledi. Avtobýs keminde 5 jyl boıy týrıstik maqsatta qoldanylýy tıis.
Kelý týrızmin yntalandyrýǵa arnalǵan sýbsıdııa
Otandyq týroperatorlar elge sheteldik týrısterdi tartqany úshin ár adamǵa 15 000 teńge kóleminde sýbsıdııa alady. Ol úshin týrıst elde keminde 4 kún, 3 tún aıaldap, eQonaq júıesinde tirkelýi qajet.
Balalarǵa arnalǵan ishki áýe bıletterin sýbsıdııalaý
Іshki týrızmdi damytý aıasynda 18 jasqa deıingi balalar el ishinde tegin áýe qatynasyn paıdalana alady. Bul úshin ata-anasy týroperatordan ishki týr satyp alýy tıis. Týrpaket quramyndaǵy balalardyń áýe bıletteri 100% sýbsıdııalanady.
Sanıtarlyq-gıgıenalyq toraptardy ustaýǵa arnalǵan sýbsıdııa
Týrıstik aımaqtar men avtomobıl joldarynyń boıynda ornalasqan sanıtarlyq-gıgıenalyq toraptardy kútip-ustaýǵa aı saıyn 83 300 teńge kóleminde ótemaqy qarastyrylǵan.
Mınıstrlik málimetinshe, bul qoldaý sharalary ishki týrıster aǵynyn arttyrýǵa, kásipkerlerge týrıstik ónimderdi damytýǵa jáne kórsetiletin qyzmetterdiń sapasyn kóterýge múmkindik beredi.
Aıta keteıik, salalyq mınıstrlik týrızm salasyna arnalǵan tsıfrlyq statıstıka júıesin engizbek.