Іshki týrızm: Qysqy demalysty qaıda ótkizgen tıimdi

ASTANA. KAZINFORM — Qysqy týrızmniń naǵyz qaınaıtyn shaǵy bastaldy. Mundaıda jurtshylyq ári arzan, ári jaıly demalys oryndaryn izdeıdi.

Al elimizde qysqy demalysty minsiz ótkizý úshin qaıda barý kerek? Maman jaýap beredi.

— Bizdiń elimizde qysqy týrızmniń ortalyǵy — Almatynyń taýly klasteri. Ondaǵy «Shymbulaq» taý-shańǵy kýrortymyz Ortalyq Azııadaǵy eń úlken, eń zamanaýı ınfraqurylymy jaqsy damyǵan kýrort. Byltyrǵy statıstıka boıynsha 2 mıllıonǵa jýyq týrıst qysqy ýaqytta osynda kelgen. Onyń ishinde kóbisi sheteldik týrıster, — deıdi travel-jýrnalıst Juldyz Rahmet «Búgin LIVE» baǵdarlamasyna bergen suhbatynda.

Qysqy maýsymda Almatyǵa ásirese Arab elderinen týrıster jıi keletin kórinedi.

— Saýd Arabııasy men Arab Ámirlikteri syndy qary joq jerlerden adam kóptep keledi. Nege Shymbulaq? Sebebi, bul jer Alpige qaraǵanda áldeqaıda arzan. Al Qyrǵyzstanmen salystyrar bolsaq, bizde tabıǵı qar bar. Odan keıin Almatynyń klımaty da óte jyly, taýy bıik — 3200 metr ári shańǵy tebýge óte yńǵaıly. Bul bizdiń qysqy týrızmdi damytýdaǵy artyqshylyǵymyz, — deıdi maman.

Jýrnalıst Almatydaǵy taý klasteriniń týrızm salasyndaǵy artyqshylyǵyna toqtaldy.

— Jalpy memlekettiń ózi qazir 3 klasterdi damytýǵa den qoıyp otyr ǵoı: Mańǵystaýdaǵy jaǵajaı, Almatydaǵy taý klasteri jáne Býrabaı. Sonyń ishinde Almatydaǵy taý klasteri óte tıimdi. Eger sheteldik týrıster bizge kelip demalar bolsa, olar úshin arzan. Oǵan qosa, jaǵajaı týrızmine qaraǵanda qysqy taý, shańǵy, snoýbord týrızmi memleketke áldeqaıda paıdaly. Mysaly, siz jaǵajaılyq týrızmge bir kúnde 50 dollar jumsasańyz, shańǵy tebý týrızmine kúnine kem degende 300 dollar jaratasyz, — deıdi ol.

Juldyz Rahmet qysqy demalysty qaıda ótkizýge bolatynyn aıtty.

— Eger sizge qonaqúıge baryp, dastarhanyńyzdy jaıyp, sondaǵy tátti taǵamdardy jep, SPA-ny, basseındi qalasańyz, onda sizge Aqtaýdaǵy qymbat qonaqúılerge barýǵa bolady. Qysta maýsym emes, baǵa arzan, Qazaqstannyń ishinde 5 juldyzdy qonaqúıde osylaı demalyp qaıta alasyz. Al eger belsendi demalys qalasańyz — taý, shańǵy, monshaǵa túsý unasa, óz qalaýyńyzǵa qaraı tańdaı alasyz. Men úshin mundaı demalysqa taptyrmas óńir — Shyǵys Qazaqstan. Qystyń otany, jalpy Aıaz atanyń eli dep te aıtýǵa bolady, — deıdi spıker.

Stýdııa qonaǵy Shyǵys Qazaqstandaǵy týrızm jaıyn da tilge tıek etti.

— Rıdder aımaǵy asa damymaǵanymen, ol jerge japondyqtar, eýropalyqtar jeke týrmen jıi keledi. Biraq ony qazaqstandyqtar bile bermeıdi. Qazaqstanda qys eń birinshi Rıdderge keledi, eń sońǵy bolyp sol jaqtan ketedi. Jalpy belsendi týrızmniń ishinde shytyrman oqıǵalar týrızmi degen bólim bar. Jalpy qarda júrýge arnalǵan kólikti bilesizder ǵoı. Sol kólikterdiń sporttyq túrleri bar. Rıdder taýyndaǵy býferli aımaqqa kirmeıtin jerlerde osyndaı kólikterdi aıdaýǵa bolady. Biraq ol qymbat. Sol úshin qazaqstandyqtar oǵan qyzyqpaıdy, — deıdi maman.

Al otbasylyq demalysty josparlasańyz, Býrabaıǵa barýǵa bolady.

— Otbasylyq demalysta qysty sezingińiz kelse — qar, syqyrlaǵan aıaz bolǵanyn qalasańyz, aqqala jasaǵyńyz kelse, árıne, shyǵys pen soltústikke kelý kerek. Onyń ishinde Býrabaıǵa. Adamdar Býrabaıda qyzmet jetispeıdi, adamdar kóp dese de, Býrabaı týrıstik aımaqtardyń ishinde TOP-ta. Sebebi, onda adamdar bári bir tabıǵaty úshin barady. Onda qysta da, jazda da adam azaımaıdy. Biraq, qysta qyzmet baǵasy jazǵa qaraǵanda tómendeıdi. Jazda qonaqúıden 2 adamdyq bólmeni 50 myńǵa jaldasańyz, qysta 30 myń teńgege ala alasyz. Býrabaıǵa baryp, jaqsylap izdep kórseńiz, 15 myńǵa da, 150 myń teńgege de qonaqúı tabýǵa bolady, — deıdi travel-jýrnalıst.

Aıta keteıik, Mańǵystaý oblysynda týrızm salasyn damytý maqsatynda jergilikti kolledjderdiń Koreıa Respýblıkasynyń oqý oryndarymen ornatqan jańa áriptestigi óńirdegi kadr daıarlaýdyń mazmunyna ózgeris engize bastady.