Іshki týrızm: elimizdegi jańa týrıstik baǵyttar qandaı
ASTANA. KAZINFORM — Bıyl elimizde birneshe týrıstik baǵyt jańaryp, jańa demalys aımaqtary paıdalanýǵa beriledi. Bul týraly QR Týrızm jáne sport mınıstrligi Týrızm ındýstrııasy komıteti tóraǵasynyń mindetin atqarýshy Nurbol Baıjanov aıtty.
— Qonaev qalasyndaǵy № 6 jáne № 7 jaǵajaılardy abattandyrý jumystaryn aıaqtap, jazǵy maýsymda kelýshilerge usynamyz. Odan bólek, týrısterdi qyzyqtyratyn Almaty oblysyndaǵy jańa baǵyt — Kóshpendiler qalasynyń maketin aıtqym keledi. Onda 6,8 shaqyrym jol salynyp, elektr jelileri tartylyp, 100 oryndyq avtoturaq ashyldy. Taǵy bir jyl saıyn kóteriletin másele — Qaıyńdy kóline aparatyn joldyń sapasy. Bul másele de ákimdik tarapynan qolǵa alynyp, 9,9 shaqyrym jol kúrdeli jóndeýden ótedi, — dedi ol.
Komıtet basshysynyń mindetin atqarýshy óńirlerdegi týrıstik marshrýttardy damytý jumystary da jalǵasyp jatqanyn atap ótti.
— Óńirdiń týrıstik baǵyttaryn damytý maqsatynda ótken jyly Qastek shatqaly men Sharyn ulttyq parkine deıingi 1,5 myń shaqyrym marshrýt zertteldi. Bul aýmaqtarda abattandyrý jumystary júrgizilip, 2GIS, Yandex jáne Google Maps platformalaryna engizildi, — dedi Nurbol Baıjanov.
Onyń sózinshe, Jetisý oblysyndaǵy Balqash kóliniń jaǵalaýynda da jańa týrıstik nysandar ashylady.
— Qazir Jetisý oblysyndaǵy Balqash kóliniń jaǵalaýynda abattandyrý jumystary júrgizilip jatyr. Bıyl tıisti ınfraqurylym tartý jáne joldardy jóndeý jumystary tolyq aıaqtalyp, halyqqa jańa jaǵajaı ashylady. Budan bólek, Lepsi stantsııasyndaǵy jańa temirjol vokzalynyń qurylysy aıaqtalyp, jańa maýsymda iske qosylady dep kútip otyrmyz, — dedi ol.
Sondaı-aq Balqash kýrorttyq aımaǵynda da aýqymdy jobalar júzege asyrylyp jatyr.
— Bıyl Balqash áýejaıyn jańǵyrtý jumystary aıaqtalyp, Balqashqa Almaty jáne Astana qalalarynan týrıstik maýsymda sýbsıdııalanatyn reıster qosylady. Sonymen qatar Shubar túbek pen Torańǵalyq eldi mekenderinde 4 jaǵajaıdy abattandyrý jumystary júrgizilip jatyr. Tıisti kelisimshartqa qol qoıyldy. Jobanyń jalpy somasy 1 mlrd teńgeden asady. Jumysty 15 maýsymǵa deıin aıaqtaımyz dep josparlap otyrmyz, — dedi Nurbol Baıjanov.
Budan bólek, Býrabaı men Imantaý kýrorttyq aımaqtarynda da ınfraqurylymdy damytýǵa basymdyq berilgen.
— Bıyl Býrabaı kentiniń ortalyq alańynda jáne Bólektaý baǵytyna rekonstrýktsııa júrgizilip, týrıstik soqpaqtar kelýshilerge qoljetimdi boldy. Sonymen qatar Býrabaı kýrortyndaǵy avtomobıl keptelisi máselesin sheshý úshin 500 kólikke arnalǵan avtoturaq salý josparlanǵan. Al Imantaý kýrorttyq aımaǵynda byltyr 20 shaqyrym avtomobıl joly salynyp, 5 shaqyrym ınternet jelisi tartyldy. Aldaǵy ýaqytta ınternet jelisin taǵy 12 shaqyrymǵa uzartýdy josparlap otyrmyz, — dedi komıtet ókili.
Aıta keteıik, Qazaqstanda týrızmge tartylǵan ınvestıtsııalar 1,2 trln teńgeden asty.
