Іshki sý qoımalary qanshalyqty toldy
ASTANA. KAZINFORM – Búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov ishki sý qoımalaryndaǵy sý kólemine qatysty málimettermen bólisti.
- Qazirgi ishki sý qoımalarynyń tolymdylyǵy jaǵdaıy jalpy turaqty. 2026 jyldyń 5 mamyryndaǵy málimet boıynsha, ońtústik óńirlerdegi sý qoımalarynda 26,2 mlrd tekshe metr sý jınalǵan. Bul ótken jyldyń osy kezeńimen salystyrǵanda 500 mln tekshe metrge artyq. Balqash-Alakól basseınindegi sý qoımalary 97 paıyzǵa toly. Almaty oblysyna 2026 jylǵa 2,1 mlrd tekshe metr, Jetisý oblysyna 1,8 mlrd tekshe metr sý lımıti bekitilgen, - dedi mınıstr.
Onyń málimetinshe, jınalǵan sý kólemi salystyrmaly túrde joǵary bolǵanymen, Almaty oblysynda Kúrti sý qoımasy aýmaǵynda sý tapshylyǵy qaýpi saqtalyp otyr. Qazir qoımada 64 mln tekshe metr sý bar. Bul ótken jylǵydan 38 mln tekshe metrge az.
- Shý-Talas basseıninde sý qoımalary 81 paıyzǵa toly. Mundaǵy negizgi alańdaýshylyq – Qyrǵyzstan aýmaǵyndaǵy Kırov jáne Orto-Tokoı sý qoımalarynyń az tolýy. Osyǵan baılanysty 2026 jylǵa Shý-Talas basseıni úshin sý lımıti 1,2 mlrd tekshe metrden 900 mln tekshe metrge deıin tómendetildi. Aral-Syrdarııa basseıninde iri sý qoımalary 87 paıyzǵa toly. Bul ótken jylǵydan 13 paıyzǵa joǵary. Shardara sý qoımasy 99 paıyzǵa tolǵan, - dedi ol.
Mınıstrdiń atap ótýinshe, qalyptasqan gıdrologııalyq jaǵdaıǵa jáne Memleketaralyq úılestirý sý sharýashylyǵy komıssııasynyń sheshimderine sáıkes, Qyzylorda oblysyna turaqty sýarýǵa 3,2 mlrd tekshe metr, Túrkistan oblysyna 3,8 mlrd tekshe metr lımıt belgilendi. Bul lımıtter negizinde aýyl sharýashylyǵy daqyldarynyń egistik qurylymy da ońtaılandyryldy.
Aıta keteıik, Úkimet otyrysynda kóktemgi dala jumystarynyń barysy talqyǵa salynyp jatyr.
