Іshki ister organdarynyń keıbir qyzmetkerleri kezekten tys attestatsııadan ótedi

ASTANA. KAZINFORM – Іshki ister organdarynyń keıbir sanattaǵy qyzmetkerleri kezekten tys attestatsııadan ótedi.

«2023 jyldyń qorytyndysy boıynsha ótken Іshki ister mınıstrliginiń keńeıtilgen alqa otyrysynda Memleket basshysy bıyl ishki ister organdarynyń keıbir sanattaǵy qyzmetkerlerin kezekten tys attestattaý týraly mınıstrliktiń bastamasyn qoldady. Osyǵan sáıkes 28 aqpanda tıisti jarlyqqa da qol qoıyldy, al attestatsııalaý 1 sáýirde bastalady», - dedi Іshki ister mınıstrliginiń resmı ókili Shyńǵys Alekeshev vedomstvoda ótken baspasóz máslıhatynda.

Onyń aıtýynsha, qazir jarlyq negizinde tıisti vedomstvolyq aktiler ázirlenip jatyr.

«Attestattaýdyń maqsaty – basshy laýazymdardy talantty jáne kásibı bilikti qyzmetkerlermen jasaqtaý úshin kadr rezervin qalyptastyrý. Tártip saqshysy bolýdy maqsat tutqan adam birinshi kezekte óz jumysyn jaqsy kórýi tıis. Otanǵa, qoǵamǵa qyzmet etý, azamattardyń qaýipsizdigin qamtamasyz etý – negizgi mindeti ekenin este ustaýy qajet. Attestattaýdyń qorytyndysy boıynsha eline adal qyzmet etetin, ıntellektýaldy jáne jeke qasıet turǵysynan joǵary deńgeıdegi naǵyz XXI ǵasyrdyń zamanaýı polıtsııasynyń qyzmetkerleri kózge túsip, sapaly kadrlyq rezerv qalyptasady dep esepteımiz», - deıdi ol.

Sondaı-aq, brıfıng barysynda attestatsııadan jeke quramnyń 6% ótetini jáne qyzmetkerlerdiń qandaı synaq tapsyratyny aıtyldy.

- Kásibı jaramdylyqty anyqtaý boıynsha normatıvterdi tapsyrý – fızıkalyq daıyndyǵy synaǵy jáne oq atý daıyndyǵy;

- Qazaqstan Respýblıkasynyń zańnamasyn bilýge jáne logıkalyq oılaýǵa kompıýterlik testileý;

- Ortalyq jáne óńirlik attestattaý komıssııalary ótkizetin áńgimelesý.