Іshki ister organdaryndaǵy oń ózgeristerdi qoǵam keı kezde baıqamaıdy – Marat Qojaev

ASTANA. KAZINFORM – Іshki ister mınıstriniń burynǵy birinshi orynbasary jáne jaqynda senator bolǵan Marat Qojaev Talǵardaǵy oqıǵadan keıin óńirdegi ishki ister organdaryndaǵy ózgeriske qatysty pikir bildirdi. 

«Bul isti mınıstr óziniń tikeleı baqylaýyna aldy. Jaqynda ǵana sol óńirdegi ishki ister salasyndaǵy departamenttiń basshylyǵy, jaýapty qyzmetkerleri aýysty. Endi sál sabyrlyq tanytyp, qylmystyq istegi tergeý amaldary aıaqtalǵansha sál kúteıik. Osydan keıin jalpy nátıjeler týraly sóılesemiz», - dedi M. Qojaev Senattyń jalpy otyrysynan keıin tilshiler suraǵyna jaýap bere otyryp. 

Onyń paıymynsha, qazir aıtylǵan árbir pikir tergeýge teris áser etýi múmkin. 

Sonymen qatar senator ishki ister organdary salasyn jetildirýge qatysty ózgerister jıi bolatynyn aıtty. 

«Ony keı kezde baıqamaı jatasyzdar. Qazir nashaqorlyqpen kúres máselesi belsendi túrde kóterilip júr. Sondyqtan jaqynda Іshki ister mınıstrliginiń qurylymynda esirtki qylmysyna qarsy is-qımyl komıteti quryldy. Jalpy, saladaǵy máselelerdiń barlyǵy retimen sheshilip jatyr dep aıta alamyn. Ár kezeńde óziniń qıyndyqtary men synaqtary bolady. Onyń bárine qatysty sheshimin izdep, eńserile beredi», - dedi depýtat. 

Marat Qojaev óziniń oıynda júrgen usynystardy aldaǵy ýaqytta senator retinde jarııalaıtynyn aıtty. 

Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz. 

Ashýly talǵarlyqtar jasóspirim ólimine baılanysty narazylyqqa shyqty. 

Marqum Sherzat Bolattyń isi boıynsha Almaty oblysynyń birneshe joǵary laýazymdy polıtsııa qyzmetkeri qyzmetinen bosatyldy.