Іshki ister mınıstrliginde kúzet qyzmetin baqylaıtyn komıtet quryldy

ASTANA. KAZINFORM – Elimizde Kúzet qyzmetin baqylaıtyn arnaıy memlekettik organ quryldy. Tıisti sheshim QR Іshki ister mınıstrliginiń keıbir máseleleri týraly QR Úkimetiniń 2026 jylǵy 29 qańtardaǵy qaýlysyna saı qabyldandy. 

– Qazaqstan Respýblıkasy Іshki ister mınıstrliginiń Kúzet qyzmetin baqylaý komıteti qurylsyn, - dep jazylǵan qujatta.

Sonymen qatar «QR Іshki ister mınıstrligi Mamandandyrylǵan kúzet qyzmeti basqarmasy (Astana qalasy)» memlekettik mekemesi taratyldy.

Al jańadan qurylǵan komıtet memlekettik mekemelerdi kúzetý qyzmetin basqaratyn ýákiletti organ bolyp aıqyndaldy.

Demek, endi Іshki ister mınıstrligine mynadaı vedomstvolar qaraıdy:

• QR ІІM Esirtki qylmysyna qarsy is-qımyl komıteti

• QR ІІM Ulttyq ulany

• QR ІІM Ákimshilik polıtsııa komıteti

• QR ІІM Kóshi-qon qyzmeti komıteti

• QR ІІM Qylmystyq-atqarý júıesi komıteti

• QR ІІM Profılaktıkalyq jumysty úılestirý komıteti

• QR ІІM Kúzet qyzmetin baqylaý komıteti

Jańadan qurylǵan komıtet memlekettik kúzet salasynda elimizdegi 19 memlekettik mekemege ýákiletti organ bolyp bekitildi. Olardyń qatarynda: QR ІІM Kúzet qyzmetin baqylaý komıtetiniń Dıplomatııalyq ókildikterdi kúzetý jónindegi mamandandyrylǵan kúzet qyzmeti basqarmasy; QR ІІM Kúzet qyzmetin baqylaý komıtetiniń Úkimettik mekemelerdi kúzetý jónindegi mamandandyrylǵan kúzet qyzmeti basqarmasy jáne t.b. mekemeler bar.

Aıta keteıik, QR ІІM Kúzet qyzmetin baqylaý komıtetin qurý týraly qaýly qol qoıylǵan kúninen bastap qoldanysqa engiziledi.

Alpamys FAIZOLLA