Іshki ister mınıstrligi úı aýmaǵynda kólik qoıýǵa qatysty resmı túsinikteme berdi
ASTANA. KAZINFORM – Áleýmettik jelide bıylǵy jyldyń 1 shildesinen bastap turǵyn úılerdiń aýlasynda kólik quraldaryn qoıýǵa tyıym salatyn normalar engiziletini týraly aqparat tarap jatyr. Osyǵan baılanysty Іshki ister mınıstrligi bul máselege qatysty Jol júrisi qaǵıdalaryna eshqandaı ózgerister engizilmegenin túsindirdi, – dep habarlaıdy Polisia.kz.
– Kólik quraldaryn toqtatý men turaqqa qoıýǵa qatysty talaptar burynǵydaı ózgerissiz qalady. Sonymen qatar kólik quraldaryn gúlzarlarǵa, kógaldarǵa, balalar jáne sport alańdaryna qoıýǵa jáne sonda toqtaýǵa tyıym salý jónindegi Jol júrisi qaǵıdalarynyń normalary qoldanysta bar ekenin eske salamyz. Sondaı-aq Іshki ister mınıstrligi jol qozǵalysyna qatysýshylardyń barlyǵyn Jol júrisi qaǵıdalarynyń talaptaryn qatań saqtaýǵa, jolda barynsha muqııat ári saq bolýǵa, ózara qurmet pen jaýapkershilik tanytýǵa shaqyrady. Balalardyń qaýipsizdigin qamtamasyz etýge erekshe nazar aýdarylady. Ata-analar men zańdy ókilderge balalardyń minez-qulqyn baqylaýdy kúsheıtip, kóshede qaýipsiz júris-turys erejelerin únemi eskertip, sondaı-aq joldyń júris bóliginde, densaýlyq pen ómirge qaýip tóndiretin ózge de oryndarda oınaýǵa bolmaıtynyn túsindirý usynylady. Tek birlesip qana biz jol qozǵalysy qaýipsizdigin qamtamasyz etip, jol-kólik oqıǵalarynyń aldyn alamyz, – dedi ІІM baspasóz hatshysy Shuǵyla Turlybek.
Aıta keteıik, osyǵan deıin 2026 jylǵy 1 shildeden bastap turǵyn úılerdiń mańyna avtokólik qoıýǵa tyıym salynady degen aqparatty Ónerkásip jáne qurylys mınıstrligi de joqqa shyǵarǵan bolatyn.
