Іshki ister mınıstrligi Sadyqovty atty degen kúdikke ilingenderge qatysty túsinik berdi

ASTANA. KAZINFORM – QR Іshki ister mınıstriniń birinshi orynbasary Marat Qojaev Kıevte Aıdos Sadyqovqa qastandyq jasady degen kúdikpen ustalǵan A. Jaqanbaevqa qatysty túsinik berdi.

Búgin Májilistiń jalpy otyrysynan keıin tilshiler ІІM ókilinen «kúdikti Jaqanbaev tergeý organdaryna ózi berildi me?» dep surady.

Óz kezeginde M. Qojaev kúdikti Qazaqstannyń ishki ister organdaryna óz betinshe habarlasqanyn aıtty.

«Qazir tergeý amaldary júrip jatyr. Arnaıy prokýrorlar osy ispen aınalysyp otyr. Іshki ister mınıstrligi qazir jedel izdestirý qyzmetimen aınalysyp jatyr», — dedi QR Іshki ister mınıstriniń birinshi orynbasary.

Sonymen qatar ol ekinshi kúdikti Meıram Qarataevty izdestirý jumystary jalǵasyp jatqanyn naqtylady.

Bıyl 22 maýsymda Qazaqstannyń Bas prokýratýrasy Kıevte Aıdos Sadyqovty atyp ketti dep aıyptalǵan kúdiktilerdiń bireýi (Altaı Jaqanbaev) qamalǵanyn habarlady. 

Eske sala keteıik, 18 maýsymda Kıevte turatyn jýrnalıst Aıdos Sadyqovty úıiniń janynda áldebireýler atyp ketti. Ol qazir aýrýhanada jatyr.

Ýkraına prokýratýrasy eki kúdiktiniń sol kúni-aq shekarany kesip ótip, elden ketip qalǵanyn habarlady.

Bas prokýratýra Aıdos Sadyqovty óltirmek bolǵandardy tabý úshin óz betinshe tergeý bastaǵan edi. 

21 maýsymda Іshki ister mınıstrligi Aıdos Sadyqovqa oq atty degen kúdiktiniń Qazaqstan polıtsııasynda jumys istemeıtinin habarlady. 

Memleket basshysy qastandyqty tergeý amaldaryn jiti baqylap otyr.