Іshki ister mınıstrligi ınternettegi qaýipti oıyndar týraly eskertý jasady
ASTANA. KAZINFORM – Jyl basynan beri sýıtsıdtik belgileri bar 43 ınternet-resýrs anyqtaldy. QR Іshki ister mınıstrligi ınternet jelisindegi balalar qaýipsizdigi týraly málimet berdi.
Bul resýrstar boıynsha aqparat ýákiletti organǵa, ıaǵnı Mádenıet jáne aqparat mınıstrligine buǵattaý úshin jiberildi.
«Keıingi ýaqytta messendjerlerde qaýipti oıyndar týraly aqparat taralýda. Mundaı oıyndarda ózin-ózi óltirý elementteri kezdespeıdi, biraq onda balalardyń psıhıkasyna teris áser etetin qashý, baǵynbaý sııaqty áreketterdi quptaý qaýpi bolýy múmkin. Osyǵan baılanysty Іshki ister mınıstrligi kámeletke tolmaǵandardyń ata-anasy men zańdy ókilderin bala tárbıesine muqııat kóńil bólýge shaqyrady», - dedi ІІM resmı ókili Shyńǵys Álekeshev.
Jalpy árbir sýıtsıd deregi boıynsha balalardy sýıtsıd jasaýǵa ıtermelegen sebepterdi jáne oǵan qatysy bar adamdardy anyqtaý maqsatynda sotqa deıingi tergep-tekserý júrgiziledi.
«Kámeletke tolmaǵandardyń óz-ózine qol jumsaýyna yqpal etetin birneshe sebep bolýy múmkin. Bul jalǵyzdyq sezimi, qıyn materıaldyq jaǵdaı, ata-analarymen nemese týystarymen janjaldasý, oqýdaǵy urystar, ata-anasynyń ajyrasýy, jaqyn adamynyń qaıtys bolýy, jazalanýdan qorqý. Sýıtsıd jasaýdyń naqty sebebi tek tergeý nátıjesimen ǵana belgili bolady», - dedi spıker.
