SQO-da qutqarýshylar shomylýǵa qaýipti sý qoımalaryn atady

PETROPAVL. KAZINFORM — Soltústik Qazaqstan oblysynda 60 shaqty ózen, 2 myńnan astam kól jáne 130-ǵa jýyq qazanshuńqyr bar. 

Biraq bıyl osy sý qoımalarynyń tek 13-inde ǵana halyq sýǵa shomylatyn arnaıy oryndar ázirlenedi. Ruqsat etilgen 60 oryn bolady.

Oblystyq ákimdikte sýǵa shomylý maýsymyna ázirlik jáne sýdaǵy qaýipsizdik pysyqtaldy. SQO Tótenshe jaǵdaılar departamenti baspasóz qyzmetiniń málimetinshe, óńirdegi alty aýdanda halyq úshin jazǵy ýaqytta sýǵa shomylyp, demalýǵa bolatyn oryn qarastyrylmaǵan. Al arnaıy jaraqtandyrylatyn 60 orynnyń tek altaýy ǵana — kommýnaldyq menshikte.

— Departament sýǵa shomylý maýsymynyń bastalýyna daıyn. Júzý quraldary, súńgýir jabdyqtary men arnaıy kıimder ázirlengen. Sońǵy úsh jylda respýblıkalyq jáne jergilikti bıýdjet esebinen gıdrotsıkl, kóp fýnktsııaly «Marlın» kateri, 2 metall qaıyq, 6 úrlemeli rezeńke qaıyq jáne 17 qaıyq motory satyp alyndy. Sý aıdyndarynda adamdardyń qaýipsizdigin qamtamasyz etý jónindegi is-sharalar jospary ázirlenip, júzege asyrylyp jatyr. Kún ysyǵan shaqta adam ómirine qaýipti sý aıdyndarynda qosymsha 5 mobıldi beket qoıý josparlanyp otyr, — dedi SQO TJD bastyǵy Jomart Asqarov.

Óńirde mundaı qaýipti sý aıdyndary jeterlik. Qutqarýshylardyń aıtýynsha, olar — Esil ózeni, Pestroe, Solenoe, Lebıaje, Úlken Torańǵul, Shalqar jáne Imantaý kólderi.

— Sý tasqyny kezindegideı, Esil ózeniniń arnasymen belgilengen marshrýt pen keste boıynsha drondarmen patrýldeý jumystary uıymdastyryldy, bul qaýipti ýchaskelerden naqty ýaqytta beınebaqylaý júrgizýge múmkindik beredi. Patrýldeý jumystaryna jastar uıymdary, polıtsııa qyzmetkerleri men áskerı qyzmetshiler tartylǵan, — deıdi Jomart Asqarov.

Departament bastyǵynyń aıtýynsha, bıyl sý aıdyndarynda qaýipsizdik erejelerin buzý nemese oryndamaý baby boıynsha bes adam ákimshilik jaýapkershilikke tartyldy.

— Qabyldanyp jatqan sharalarǵa qaramastan, sońǵy 5 jylda oblys boıynsha 46 adam sýǵa ketken, onyń ishinde 10-y — bala. Al byltyr respýblıka kóleminde 162 adam sýǵa ketse, onyń 50-i — bala bolǵan, — deıdi Jomart Asqarov.

Buǵan deıin SQO — AITV-men aýyrý deńgeıi ortasha óńirler tobyna aýystyrylǵanyn jazǵan edik.