Іshki ister mınıstrligi eks-sheneýnik Qýandyq Bıshimbaevtyń isine qatysty túsinik berdi
Іshki ister mınıstriniń birinshi orynbasary Marat Qojaev óz áıelin óltirdi degen kúdikke ilingen eks-sheneýnik Qýandyq Bıshimbaevtyń isine qatysty túsinik berdi, dep habarlaıdy Kazinform.
Búgin Senattyń jalpy otyrysynan keıin tilshiler mınıstrdiń orynbasarynan eks-sheneýnik Bıshimbaev isinde nege tergeýshiler qaıta-qaıta aýysyp jatqanyn surady.
Óz kezeginde Marat Qojaev tergeý amaldary barysynda is derekteri ázirge jarııalaýǵa jatpaıtynyn aıtty.
«Birinshi kúni oqıǵa ornyna kezekshi tergeý toby jiberiledi. Erteńinde tergeý isi basqa mamanǵa tapsyrylýy múmkin. Sondyqtan osyndaı málimet tarap jatqan shyǵar. Atap aıtqanda, is arnaıy bir adamǵa tapsyrylady. Onyń janynda taǵy tergeýshiler bolady. Qylmystyq isti jalǵyz bir adam tergemeıdi, top bolyp tergeýi múmkin», - dedi mınıstrdiń birinshi orynbasary.
Onyń aıtýynsha, osy is boıynsha sot-medıtsınalyq saraptamasy ádette bir aı júrgiziledi.
Sonymen qatar tilshiler Bıshimbaevtyń qylmysyn jasyrǵan týysyna qatysty qandaı shara qoldanylatynyn surady.
«Birneshe adamnyń ústinen qylmystyq is qozǵalǵan. Tergeý amaldary jalǵasyp jatyr. Sonyń nátıjesinde kim qandaı jaýapqa tartylatyny anyqtalady. Zań talaby boıynsha basqa málimetti aıta almaımyn», - dedi Marat Qojaev.
Aıta keteıik, 9 qarashada Astanadaǵy Baý meıramhanasynda 20:30 shamasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqqan. Áıel jedel járdem kelgenshe jan tapsyrdy.
Іshki ister mınıstrligi Astana meıramhanasyndaǵy kisi ólimi boıynsha Qýandyq Bıshimbaevtyń ustalǵanyn rastady.
Astana qalasyndaǵy meıramhanalardyń birinde áıeldiń qaza tabý faktisi boıynsha elorda polıtsııa departamenti Qazaqstan Respýblıkasy QK-niń 99-baby 1-bóligi boıynsha tergeý jumysyn bastady.
11 qarashada Astana qalasynyń mamandandyrylǵan aýdanaralyq tergeý soty kúdikti Qýandyq Bıshimbaevqa qatysty 2 aı merzimge qamaýǵa alý túrindegi bultartpaý sharasyn sanktsııalady.
Burynǵy mınıstrdiń isi boıynsha kisi ólimi tirkelgen «Gastro-Ortalyq» meıramhanasynyń dırektory ustaldy.
