Іshki ister mınıstri adam ólimi kóp tirkelgen joldardy atady
ASTANA. KAZINFORM — Respýblıkalyq mańyzy bar joldarda adam ólimi kóp tirkeledi. Bul týraly búgin Úkimet otyrysynda Іshki ister mınıstri Erjan Sádenov aıtty.
— Kelesi másele — respýblıkalyq mańyzy bar joldar. Qaza tapqandardyń teń jartysy osy joldarda oryn alyp jatyr. Adam ólimi eń kóp tirkelgen jol ýchaskeleri Jambyl oblysynda «Almaty — Tashkent» trassasy — 60 adam, Almaty oblysynda: «Almaty — Bishkek» — 33 adam, «Almaty — Óskemen» — 12 adam jáne «Almaty — Kókpekti — Kóktal» trassasy — 17 adam, sondaı-aq, Aqtóbe oblysynda: «Shymkent — Samara» — 19 adam, «Aqtóbe — Atyraý» baǵytynda 14 adam kóz jumdy, — dedi ol.
Erjan Sádenovtiń aıtýynsha, jol boıyndaǵy servıs sapasy da aıtarlyqtaı jaqsy emes. Kempıng jáne tamaqtaný oryndary óte az. Júrgizýshiler demalyssyz kólikti aıdaýǵa májbúr. Sonyń saldarynan, uıqtap ketedi.
— Jalpy, zamanaýı talaptarǵa joldardyń tek 16 paıyzy ǵana saı keledi. 1-sanatqa jatatyn 6 myń shaqyrym jol salynýy qajet. Onyń tıimdiligi óte joǵary. Mysaly, Qaraǵandy men Almaty arasynda 4 jolaqty magıstral iske qosyldy. Osy ýchaskede adam ólimi 47 paıyzǵa azaıdy. Kólik mınıstrligi men «QazAvtoJol» bul máseleni tezdetip qolǵa alý kerek. Sonymen qatar, ákimdermen birlesip, qysqy kezeńge daıyndalý qajet: Tehnıkanyń jaramdylyǵyn qamtamasyz etý, ınertti materıaldyń jetkilikti qoryn jasaqtaý, jylytý pýnktterdi uıymdastyrý, habarlandyrý júıesin pysyqtaý. Osynyń bárine qazirden bastap daıyndyqty bastaý kerek, — dedi mınıstr.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
