Іshki saıasattyń jańa tujyrymdamasy: halyqty uıystyratyn negizgi qundylyqtar aıqyndalady
ASTANA. KAZINFORM – Jaqyn arada Senatta Salyq jáne Qurylys kodeksteri, Bankter týraly jańa zań talqylanady. Bul týraly búgin elordada Senat tóraǵasy Máýlen Áshimbaev málim etti.
- Reformalardyń jańa kezeńiniń taǵy bir mańyzdy baǵyty – qoǵamdy ortaq múddege jumyldyrý, jalpyulttyq qundylyqtar júıesin ornyqtyrý jáne halyqtyń birligin nyǵaıtý. Ulttyq quryltaıdyń tórtinshi otyrysynda Prezıdentimiz ishki saıasattyń jańa Tujyrymdamasyn pysyqtaýdy tapsyrdy. Bul tujyrymdamalyq qujatta biregeılikti arttyratyn jáne halyqty uıystyratyn negizgi qundylyqtar aıqyndalýǵa tıis. Prezıdentimiz Ádiletti Qazaqstan qurý úshin durys qundylyqtar júıesi men saıası mádenıet qalyptastyrý qajet ekenin, sol jolda qajyrly eńbek etý kerektigin aıtty. Sol sebepti, Quryltaı otyrysynda belgilengen basymdyqtardy iske asyrýǵa belsendi qatysý – bárimizdiń ortaq mindetimiz. Bul jerde de máslıhattar úlken ról atqarady dep oılaımyz, - dedi M. Áshimbaev Senat janyndaǵy máslıhattarmen ózara is-qımyl jónindegi keńestiń keńeıtilgen otyrysynda.
Onyń paıymynsha, osy rette ár depýtat Memleket basshysy aıtqan «Adal azamat» ıdealdary – jaýapkershilik, adaldyq, ádildik sııaqty qundylyqtardyń jarshysy bolýy qajet. Jalpy, Prezıdent reformalarynyń jańa kezeńin iske asyrýda jergilikti bılik organdaryna erekshe mıssııa júkteledi.
- Memleket basshysynyń tapsyrmasymen Parlament ekonomıkalyq saıasattyń jańa úlgisin jáne memlekettik basqarý júıesin zańnamalyq turǵydan qamtamasyz etý úshin keshendi jumys júrgizip keledi. Senat osy iske máslıhattardy tartyp, olardyń zań shyǵarý jumysyna qatysýyna úlken mán berip otyr. Máselen, jańa Bıýdjet kodeksin qaraý kezinde 90-ǵa jýyq túzetý engizildi. Olardyń aıtarlyqtaı bóligi óńirlerdiń bastamalary ekenin aıta ketken jón. Jaqyn arada Senatta Salyq jáne Qurylys kodeksteri, Bankter týraly jańa zań talqylanady. Osy zańdardy qaraýǵa da máslıhat depýtattaryn jumyldyramyz, - dedi Senat spıkeri.
Budan buryn habarlanǵandaı, búgin elordada Senat janyndaǵy máslıhattarmen ózara is-qımyl jónindegi keńestiń keńeıtilgen otyrysy ótip jatyr.
Bıyl naýryz aıynda ótken Ulttyq quryltaı otyrysynda Prezıdent ishki saıasattaǵy sharýanyń bárin júıeleıtin birtutas tujyrymdamalyq qujat kerek ekenin aıtty.