Іshki saıasatta kemel adam qalyptastyratyn ıdeologııa bolýy tıis – Edil Jańbyrshın
ASTANA. KAZINFORM — Іshki saıasat tujyrymdamasy rýhanı myqty, ǵylym-bilimmen qarýlanǵan, júreginde adamgershilik meıirim men ádilettik prıntsıpteri bar adamdy qalyptastyrýy tıis. Mundaı pikirdi BIZDIÑ ORTA podkasynda Májilis depýtaty Edil Jańbyrshın bildirdi.
— Keńes odaǵy ydyraǵannan keıin burynǵy kommýnıstik ıdeologııa qurdymǵa ketti dep esepteıik. Sodan keıin bizde ıdeologııalyq vakýým paıda boldy. Memleket ıdeologııa jaǵynan óziniń naqty tujyrymdamasyn nemese strategııasyn jasaqtaı almady. Keńistik bos turmaıdy. Sondyqtan jan-jaqtan kóptegen ártúrli ıdeologııalyq aǵym kirdi. 90 jyldardyń basynda «Hare Krıshna» dep qazaq balalarynyń kóshede júrgenin bilemiz. Iegova, ýahabızm bos turǵan keńistikke endi. Memlekettiń olarǵa tosqaýyl qoıatyn nemese ishki ıdeologııasyn júrgizetin múmkindigi bolmady. Mine, osy máseleni kópten beri aıtyp kele jatyrmyz. Quryltaıda da bul másele kóterildi. Sheshim qabyldaıtyn azamattarmen jeke kezdeskende de aıtylyp júr. Parlament tórinde birneshe ret aıtyldy. Býrabaıdaǵy quryltaıda Prezıdent birinshi ret ishki saıasattaǵy sharýanyń bárin júıeleıtin birtutas tujyrymdamalyq qujat ázirleý bastamasyn kóterdi, — dedi depýtat.
Onyń atap ótýinshe, qujattyń tujyrymdama álde doktrına ne strategııa bolatyndyǵyn jan-jaqty pysyqtaý qajet.
— Menińshe, strategııa nemese doktorına bolýy kerek sııaqty. Óıtkeni, ol uzaq jyldarǵa jalǵasatyn dúnıe bolýy tıis. Jalpy, memlekettiń ishki ıdeologııada bir ustanymy bolýy qajet. Meniń túsinigimde sonaý tól tarıhymyz, tereń tarıhymyzben baılanystyrý kerek. Onda dástúr, rýhanı máseleler, qazaq ultyna tán ustanymdar men qaǵıdalar bolýy tıis. Biz keshe paıda bolǵan memleket emespiz. Tarıhymyz óte tereń. Sony irgetas qylyp, qujatqa engizýimiz qajet. Sebebi ol adamnyń qanynda, geninde bar. Eger biz oǵan jol taba almaıtyn bolsaq, onda jazylǵan qujat bos dúnıe bolyp qalady, — dedi Edil Jańbyrshın.
Májilis depýtaty Prezıdenttiń «adal azamat», «estıtin memleket», «Taza Qazaqstan», «myqty Prezıdent, yqpaldy Parlament, esep beretin Úkimet» sııaqty kóptegen ustanymy da osy qujatta oryn tabýy kerektigine nazar aýdartady.
— Toqeteri bul saıası ıdeologııanyń negizgi maqsaty ne? Eń basty maqsaty kemel adamdy, myqty adamdy qalyptastyratyn ıdeologııa bolýy tıis. Ol adam rýhanı myqty, ǵylym-bilimmen qarýlanǵan, júreginde adamgershilik meıirim men ádilettik prıntsıpteri bar tulǵa bolýy qajet, — dedi ol.
Eske salsaq Ulttyq quryltaıdyń IV otyrysynda Memleket basshysy Qasym-Jomart Toqaev ulttyq bolmysymyzdyń mańyzdy kórinisi ulttyq kıimdi jan-jaqty dáripteý kerek ekenin aıtqan edi.