Іshki saıasat ulttyq múddege, memlekettik saıasatqa qyzmet etýi kerek – Ermurat Bápı
ASTANA. KAZINFORM — Іshki saıasat eń birinshi ulttyq múddege, memlekettik saıasatqa qyzmet etýi kerek. Mundaı pikirdi BIZDIÑ ORTA podkasynda Májilis depýtaty Ermurat Bápı bildirdi.
— Qazirgi kezde qarap otyrsaq, bizdegi ishki saıasat árbir ákimniń tikeleı murasy bolyp ketti. Ár ákimniń ishki saıasaty bar. Іshki saıasat bóliminiń bári ákimderge qyzmet etedi. Іshki saıasat eń birinshi ultqa, ulttyq múddege, memlekettik saıasatqa qyzmet etýi kerek. Odan keıin ǵana ýaqyty qalsa ákimniń anaý-mynaý is-sharasyna, baryp kel, shaýyp keline qyzmet etýi qajet. Eń bastysy bizdiń memlekettigimiz. Al memlekettiń negizgi keregesin, ýyǵyn ishki saıasat ustap turýy tıis. Osy turǵydan kelgende kópten beri suranysta bolǵan qujat (ishki saıasattaǵy sharýanyń bárin júıeleıtin birtutas tujyrymdamalyq qujat) dep esepteımin, — dedi Ermurat Bápı.
Májilis depýtaty atalǵan qujatty ázirleýge, depýtattar, memlekettik organdar men qoǵamdyq ınstıtýttar qatysýy kerektigin aıtady.
Osy oraıda Májilis depýtaty Edil Jańbyrshın osydan biraz ýaqyt buryn ishki saıasat basqarmalaryn ózgertý kerektigi týraly Úkimet atynan depýtattyq saýal joldaǵanyn atap ótti.
— Іshki saıasat degennen ketip, Qoǵammen baılanys departamentterin qurý týraly usynys bergen edim. Estıtin memlekettiń prıntsıpin ary qaraı iske asyrýymyz qajet. Іshki saıasat basqarmalary aqparatpen jáne nasıhatpen aınalysady. Ekijaqty birdeı seriktestik modeli joq. Biz burynǵy qalyp qoıǵan ákimshilik-komandalyq memleket basqarýdyń elementterin áli ustanyp otyrmyz. Endi Prezıdenttiń «estıtin memleket» prıntsıpin alar bolsaq, onda jergilikti bılikte, mınıstrlikterde estıtin qulaq bolýy tıis. Barlyq damyǵan elde, tipti úlken korporatsııalarda Qoǵammen baılanys departamenti bar. Demek, biz qoǵamdaǵy barlyq problemany súzip alyp, soǵan saı qyzmet etýimiz qajet, — dedi ol.
Buǵan deıin Edil Jańbyrshın elimizdiń ishki saıasatyndaǵy sharýanyń bárin júıeleıtin birtutas tujyrymdamalyq qujat doktrına ne strategııa bolýy tıistigin aıtqan edi.
Sonymen qatar depýtat jalǵan tarıh jasaýdyń qajeti joq degen edi.