Іshki saýdadaǵy 460 jobaǵa 4,3 mlrd teńge memlekettik qoldaý kórsetildi

ASTANA. KAZINFORM — Ótken jyly ishki saýda salasyn qoldaýǵa baǵyttalǵan keshendi memlekettik sharalar óz nátıjesin berdi. Ekinshi deńgeıli bankter arqyly nesıelerdi sýbsıdııalaý men kepildendirý tetikteri iske qosylyp, respýblıka boıynsha 460 joba qarjylandyryldy. Bul týraly Saýda jáne ıntegratsııa mınıstrligi málim etti. 

Byltyr ishki saýda salasynda ekinshi deńgeıli bankter arqyly nesıelerdi sýbsıdııalaý jáne kepildendirý tetikterine negizdelgen keshendi memlekettik qoldaý sharalary iske qosyldy. Baǵdarlama óńirlerde saýdanyń zamanaýı formattaryn damytýǵa jáne ınfraqurylymdy jańǵyrtýǵa baǵyttalǵan. 

Mınıstrliktiń málimetinshe, baǵdarlamaǵa Astana, Almaty, Shymkent qalalary jáne saýda oıyn-saýyq ortalyqtary qatyspaıdy.

— Oblys ortalyqtarynda júzege asyrylatyn jobalar úshin kredıt somasy 3 mlrd teńgeden aspaýy tıis. Monoqalalarda, shaǵyn qalalarda jáne aýyldyq eldi mekenderde bul shek 1,5 mlrd teńgeni quraıdy. Sýbsıdııalanatyn syıaqy mólsherlemesi 10,75% deńgeıinde belgilengen. Investıtsııalyq maqsattarǵa sýbsıdııalaý merzimi 5 jylǵa deıin, al aınalym qarajatyn tolyqtyrýǵa 3 jylǵa deıin qarastyrylǵan, — delingen habarlamada.

Mınıstr memlekettik qoldaý kórsetý kásipkerlerdiń qarsy mindettemelerdi oryndaýmen qatar júretinin atap ótti. Memlekettik qoldaý alǵan kásipkerler otandyq taýar óndirýshilerdiń ónimderin saýda sórelerine ornalastyrýy qajet. Azyq-túlikke jatpaıtyn taýarlar boıynsha úles keminde 20%, al azyq-túlik taýarlary boıynsha 50% bolýy qajet. Onyń 30%-y qoldanystaǵy Іshki saýda qaǵıdalary aıasynda, qosymsha 20%-y memlekettik qoldaý sharalary sheńberinde qarastyrylǵan.

Qazirgi ýaqytta mınıstrlik qazaqstandyq óndirýshilerdiń basymdyǵyn kúsheıtýge baǵyttalǵan ózgeristerdi pysyqtap jatyr. Aınalym qarajatyn tolyqtyrýǵa qarjylandyrý alǵan jaǵdaıda tıisti tizilimge engizilgen otandyq taýar óndirýshilerden taýar, shıkizat jáne materıaldar satyp alý talaby engiziledi. Sondaı-aq tirkelgenine úsh jyldan aspaǵan bastaýshy qazaqstandyq óndirýshilerdiń ónimin olardyń jazbasha ótinimi negizinde keminde úsh aı merzimge saýda alańdaryna tegin ornalastyrý mindeti kózdeledi.

Budan bólek, sýbsıdııalaý nemese kepildendirý sharttary jasalǵan sátten bastap bir jyl ishinde jaldaý aqysynyń mólsherin ózgertýge tyıym salynady. Kásipkerlerge statgov.kz tsıfrlyq júıesi arqyly Ulttyq statıstıka bıýrosyna eseptilikti ýaqtyly tapsyrý mindeti júkteledi.

Ótken jyly memlekettik qoldaýǵa shamamen 4,3 mlrd teńge bólindi. Nátıjesinde ekinshi deńgeıli bankter arqyly respýblıka boıynsha 460 joba qarjylandyryldy.

Buǵan deıin byltyr saýda salasy ekonomıkalyq ósimniń 26%-yn qamtamasyz etkenin jazdyq.