Іshki naryqty qamtýda másele týyndasa, kartop eksportyna tyıym salamyz — Jumanǵarın

ASTANA. KAZINFORM — Іshki naryqty qamtamasyz etýde másele týyndasa, kartop eksportyna tyıym salamyz. Bul týraly Úkimet otyrysynan keıingi brıfıngte Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.

Ony dereginshe, bıyl elimizde 2,9 mln tonna kartop jınaldy. Bul Úkimet boljaǵan kólemnen álde qaıda kóp.

— Bir adamǵa 100 keli tutyný normasymen eseptesek, bizge shamamen 2-2,1 mln tonna qajet. Eksport 500 myń tonnadan asqan kezde syrtqa shyǵarýdy tejeı bastaıtyndyǵymyzdy birneshe ret aıttyq. Óıtkeni, kórshi elderde kartop baǵasy álde qaıda joǵary jáne bul bizdiń básekelestik basymdymyǵyz. Qazirgi ýaqytta kartop ósirýshilerimiz eksport esebien tabys taýyp jatyr ári biz olarǵa bóget bolmaımyz. Degenmen, ishki naryqty qamtamasyz etý máselesi týyndaǵan jaǵdaıda, 500-600 myń tonnasyn satqannan keıin eksportqa tyıym salatyn shyǵarmyz nemese kvota belgilermiz, — dedi vıtse-premer BAQ ókilderiniń saýalyna oraı.

Onyń aıtýynsha, saýda sharalaryn qoldaný týraly másele syrtqy saýda qyzmeti jónindegi vedomstvoaralyq komıssııa qaraýyna shyǵarylǵan.

Sondaı-aq ol kartop baǵasy bir aıda 4,5 paıyzǵa qymbattap, 180 teńgege jetkenin jáne bul joǵary ósim emestigin atap ótti.

— Biz 300 tonna kartop eksporttadyq. 200 tonnaǵa kelisimshart bar. Biraq, áli eksportqa shyǵarylǵan joq. Sondyqtan da biz aldyn alý sharalaryn der ýaqytynda qabyldaımyz, — dedi Serik Jumanǵarın.

Taıaýda Aýyl sharýashylyǵy vıtse-mınıstri Azat Sultanov bıyl elimizde 3 mln tonnaǵa jýyq kartop jınalǵanyn jáne tapshylyq bolmaıtynyn aıtqan edi.