Іshki naryqty qamtamasyz etkennen keıin ǵana eksportqa shyǵarylatyn shıkizat túrleri keńeıtiledi

ASTANA. KAZINFORM — Іshki naryqty qamtamasyz etkennen keıin ǵana eksportqa shyǵarylatyn shıkizat túrleri keńeıtiledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.

— Jańa óndiristerdi qoldaýda memlekettik damý ınstıtýttarynyń róli zor. 2022 jyldan bastap, jeńildetilgen nesıemen 116 joba qarjylandyryldy. Bul maqsatqa bıýdjetten 500 mlrd teńgeden astam qarajat bólinip, ol naryqtan tartylǵan qarajatpen mıksherleý arqyly 700 mlrd teńgege deıin artty. Nátıjesinde radıatorlar, avtokomponentter, shulyq buıymdary, lak-boıaý jáne geosıntetıkalyq materıaldar óndiristeri iske qosyldy, — dedi ol.

Mınıstr ishki óńdeýdi damytýǵa yqpal etetin tıimdi sharalardyń biri kásiporyndarǵa shıkizatty jeńildikpen usyný ekenin aıtty.

— Іri óndirýshiler aldymen ishki naryqty shıkizatpen qamtamasyz etip, sodan keıin ǵana eksportqa lıtsenzııa alady. Qazirde bul mehanızm mys, alıýmınıı jáne myrysh metaldaryna qoldanylyp jatyr. Jeńildik mólsheri óńdeý deńgeıine baılanysty: daıyn ónim úshin — 5, al aralyq ónim úshin — 1 paıyz, — dedi Ersaıyn Naǵaspaev.

Onyń aıtýynsha, tetik engizilgen sátten bastap 30 kelisim jasalyp, atalǵan metaldar óńdeý kólemi artyp otyr.

— Máselen, jyl sońyna deıin mys óńdeý kólemin — 40, alıýmınııdi — 20, myryshty 25 paıyzǵa arttyrý josparlanýda. Sonymen qatar, qazir basqa salalar boıynsha da shıkizat túrlerin keńeıtý pysyqtalyp jatyr, — dedi ol.

Aıta keteıik, Úkimet otyrysynda óńdeý ónerkásibin damytý jáne tsıfrlandyrý máselesi qaralyp jatyr.