Іshki naryqtaǵy suranysta oń dınamıka saqtalyp otyr - Súleımenov
ASTANA. KAZINFORM — Іshki naryqtaǵy kredıtteý turaqtandy. Bul týraly elordada ótken brıfıngide Ulttyq bank tóraǵasy Tımýr Súleımenov málim etti.
- Qazaqstan ekonomıkasy oń dınamıkany úzbeı kórsetip keledi. 2026 jylǵy qańtar-qyrkúıek aılarynyń qorytyndysy boıynsha ishki jalpy ónim ósip, jyldyq mánde 4,2% boldy. Taý-ken ónerkásibin esepke almaǵanda, jalpy ishki ónimniń ósýi 5,4% deńgeıinde baǵalanady. Ósýge negiz bolǵan basty draıver – shıkizatqa jatpaıtyn sektor. Joǵary ósý qarqyny qurylys, óńdeý ónerkásibi, kólik jáne saýda salalarynda baıqalady. Aýyl sharýashylyǵy men baılanys qyzmetinde de oń dınamıka saqtalyp otyr. Degenmen, ekonomıkanyń jalpy ósimine munaı óndirisindegi qysqarý da áser etip otyr, onyń kólemi 9 aıda 8,3 paıyzǵa azaıǵan, - dedi T. Súleımenov.
Onyń aıtýynsha, ınvestıtsııalyq belsendilik joǵary. Qańtar-qyrkúıek aılarynda negizgi kapıtalǵa ınvestıtsııa – naqty mánde 7 paıyzǵa, al bıýdjet qarajatyn qospaǵanda, shıkizattyq emes sektorǵa 25 paıyzǵa ósti. Kúrdeli salymdardyń joǵary ósý qarqyny óńdeý ónerkásibi men energetıka salasynda baıqaldy.
- Іshki suranysta oń dınamıka saqtalyp otyr. Qańtar-qyrkúıek aılarynda bólshek saýdanyń naqty ósimi 4,5% boldy. Tutynýshylyq kredıtteý turaqtandy. Tamyz aıynda tutyný kredıtteriniń jyldyq ósý qarqyny 10,4% boldy. Jalpy alǵanda, tutynýshylyq suranys birtindep qalypqa kele bastaǵany baıqalady. Bul baǵany odan ári tómendetýge qolaıly jaǵdaı jasaıdy. Sonymen birge, memlekettik jáne kvazıfıskaldyq baǵdarlamalar esebinen qoldaý taýyp otyrǵan joǵary ınvestıtsııalyq belsendilik jıyntyq suranysty úzdiksiz yntalandyryp otyr. Bul suranystyń otandyq ekonomıkanyń múmkindikterinen asyp túsý táýekelin kúsheıtedi, - dedi UB basshysy.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
