Іshki naryqtaǵy otandyq qurylys materıaldarynyń úlesi 80 paıyzǵa jetkizilmek
ASTANA. KAZINFORM – Aldaǵy úsh jylda ishki naryqtaǵy otandyq qurylys materıaldarynyń úlesin 80 paıyzǵa deıin jetkiziledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
- Memleket basshysy Joldaýynda jańa óndiristerdi ashý kezinde naryq suranysyn, ár óńir men salanyń ózindik ereksheligin eskere otyryp, óndiristi damytý qajettigin atap ótti. Osy tapsyrmany oryndaý maqsatynda mınıstrlik óndiris qýattarynyń balansyn baǵalaý tetigin engizip, qajetti zańnamalyq ózgerister qabyldady, óndiristi baǵalaý ádistemesin bekitti. Ádistemede ishki naryqtyń suranysy, ónimdi eksporttaý múmkindigi jáne óndiristi shıkizatpen qamtamasyz etý deńgeıi eskeriledi. Osylaısha, baǵalaý nátıjesi jańa jobalarǵa memlekettik qoldaý kórsetý jáne ınvestıtsııa tartý sheshimderin qabyldaý kezinde eskeriletin bolady, - dedi ol.
Ersaıyn Naǵaspaevtyń atap ótýinshe, Memleket basshysynyń 2027 jyldy Halyqtyq qurylys jyly dep jarııalaýy otandyq qurylys materıaldaryn, jabdyq pen buıymdar óndirisin damytýǵa qosymsha serpin beredi.
- Qurylys salasyn damytý jónindegi aýqymdy mindetter otandyq óndiristi jáne ishki naryqtaǵy qazaqstandyq ónimniń úlesin arttyrýmen qatar júrýge tıis. Búginde ishki naryqtaǵy suranystyń shamamen 73%-y otandyq ónimge tıesili. Alaıda jylý oqshaýlaǵysh jáne keramıkalyq taqta, kompozıttik jáne qaptaý materıaldary sııaqty jekelegen ónim túrleri ımportqa táýeldi bolyp otyr. Osyǵan baılanysty «Halyqtyq qurylys» baǵdarlamasy aıasynda qurylys materıaldaryna degen qajettilik aıqyndalyp, olardy óndiretin jańa kásiporyndarǵa ınvestıtsııa tartý jumystary júrgiziledi, - dedi mınıstr.
Onyń aıtýynsha, qurylys jobalaryn iske asyrý kezinde otandyq qurylys materıaldaryn negizsiz ımporttyq ónimdermen almastyrýǵa jol bermeý sharalary qabyldanady. Ol úshin Qazaqstandyq taýar óndirýshiler tizilimindegi aqparat qurylys salasynyń tsıfrlyq júıelerinde kórsetilýi tıis.
- Basty maqsat – aldaǵy úsh jylda aýqymdy qurylys jumystary aıasynda ishki naryqtaǵy otandyq qurylys materıaldarynyń úlesin 80%-ǵa deıin jetkizý. Mınıstrlik Memleket basshysynyń Joldaýynda belgilengen mindetterdi oryndaý barysynda otandyq ónerkásiptiń turaqty ósýin qamtamasyz etýge, jańa óndiristerdi damytýǵa jáne qazaqstandyq taýarlardyń naryqtaǵy básekege qabilettiligin arttyratyn sharalardy júıeli túrde iske asyrýdy jalǵastyrady, - dedi ol.
Aıta keteıik, elimizde 17 myńnan astam jumys orny ashylatyn 200 joba iske asyrylady.