Іshki naryqta otandyq polıpropılenniń úlesi artyp keledi
ASTANA. KAZINFORM – 2025 jyldyń birinshi jartysynda elimizdegi polıpropılen naryǵyndaǵy basty oıynshyǵa aınalǵan Kazakhstan Petrochemical Industries Inc. (KPI) ishki naryqtaǵy úlesin 70 paıyzdan asyryp, 2024 jylǵy 57%-ben salystyrǵanda aıtarlyqtaı serpilis jasady. Bul jetistik – QazMunaıGaz ben SIBÝR arasyndaǵy strategııalyq seriktestiktiń nátıjesi.
Atyraýdaǵy zaýyt 2025 jyldyń bes aıynda 175 myń tonna ónim óndirip, maýsym aıynyń sońyna deıin 19 myń tonnaǵa jýyq kólemi ishki naryqta satylady dep josparlanyp otyr. Bul – burynǵy jyldardyń jyldyq kólemine teń kórsetkish. KPI-dyń birneshe jyl boıy qalyptastyrǵan senimdi seriktestik júıesi men tutynýshyǵa baǵyttalǵan qyzmeti el ishindegi óńdeý salasynyń jandanýyna túrtki boldy. Tek 2025 jyldyń alǵashqy bes aıynda ishki suranys 28%-ǵa ósti.
KPI iske qosylǵan 2022 jyldan beri elimizdegi polımer ónimin óńdeýmen aınalysatyn kásiporyndar sany 80-nen 130-ǵa artyp otyr. Onyń ishinde keıingi eki jylda jańadan qurylǵan kompanııalar ishki naryqtaǵy KPI satý kóleminiń tórtten birin quraıdy.
Kompanııa tabysynyń basty sebepteriniń biri – zamanaýı tehnologııalyq baza. SIBÝR-men áriptestik nátıjesinde buryn elde óndirilmegen on bir túrli polıpropılen markasy ıgerildi. Bul – jergilikti óndiris úshin qajetti shıkizatty el ishinde qoljetimdi etýge múmkindik berdi. Injenerlik bólshekterden bastap, toqyma men qaptamaǵa deıin túrli saladaǵy kásiporyndar úshin bul mańyzdy qadam boldy.
2022 jylǵa deıin el suranysynyń 60 paıyzdan astamy sheteldik ımportqa táýeldi bolsa, búginde KPI ishki qajettiliktiń negizgi bóligin ótep, eksporttyq baǵytta da belsendi jumys júrgizip keledi. Qazaqstandyq polıpropılen búginde Eýropa, Túrkııa, Reseı men Qytaıǵa jóneltiledi.
Alaıda óndiristi odan ári damytý úshin shıkizat jetkilikti bolý jetkiliksiz. Infraqurylym, tehnologııa, mamandar men kásipkerlikti qoldaıtyn júıeli baǵdarlama qajet. Osy turǵyda KPI óz mıssııasyn tek óndirýshi retinde emes, sala qalyptastyratyn ındýstrııalyq seriktes retinde qarastyryp otyr. Kompanııa polıpropılennen daıyn ónim shyǵarý isin elde jolǵa qoıýǵa nıetti kásiporyndarǵa jan-jaqty qoldaý kórsetýge daıyn.