Іshki naryqta et tapshylyǵy joq - AShM baǵanyń qalyptasýyna ne áser etetinin túsindirdi

ASTANA. KAZINFORM – Eldegi ishki naryqta et tapshylyǵy joq, baǵanyń ósýine basqa jaǵdaılar da áser etip otyr. Bul týraly Kazinform agenttigi joldaǵan saýalǵa Aýyl sharýashylyǵy mınıstrliginiń resmı jaýabynda aıtylǵan.

— Aýyl sharýashylyǵy ónimderi baǵasynyń qalyptasýyna birneshe faktor áser etedi. Olarǵa ónimniń ózindik qunyna tikeleı yqpal etetin taýarlar men qyzmetterdiń baǵasynyń ózgerýi, maýsymdyq, azyq-túlik ónimderin tasymaldaý men saqtaý shyǵyndarynyń artýy, deldaldardyń kóp bolýy, saýda núktelerindegi joǵary ústeme baǵa, sondaı-aq álemdik naryqtarda uqsas ónimder baǵasynyń ósýi jatady. Qazirgi et baǵasynyń ósýi ishki naryqtaǵy tapshylyqqa baılanysty emes, óıtkeni halyqtyń suranysyn óteýge jetkilikti qor bar. 2025 jylǵy 1 sáýirdegi jaǵdaı boıynsha eldegi iri qara mal sany 8,9 mln boldy, bul - ótken jylmen salystyrǵanda 22,8%-ǵa kóp (2024 jylǵy 1 sáýirde – 7,2 mln). Budan bólek, sıyr eti óndirisi ishki naryqtyń qajettiligin 102% qamtamasyz etip otyr, - delingen habarlamada.

Sondaı-aq vedomstvo elde et óndirisi kólemi jyldan-jylǵa artyp kele jatqanyn aıtady.

— 2024 jyldyń qorytyndysy boıynsha respýblıkada sıyr eti óndirisi 430 myń tonna bolyp, 2023 jylmen salystyrǵanda (399,3 myń tonna) 7,5%-ǵa artty. 2025 jyly bul dınamıka saqtalyp otyr: qańtar-naýryz aılarynda 82,2 myń tonna sıyr eti sattyqqa shyǵaryldy (qańtar – 24,7 myń tonna, aqpan – 24,8 myń tonna, naýryz – 32,7 myń tonna), - delingen habarlamada.

Aıta keteıik, et baǵasy buryn-sońdy bolmaǵan mejege jetti. Máselen, Astanada semiz ári jas ettiń kelisi ortasha 3400-3600 teńgeden tur. Baǵaǵa qatysty basqa da derekterdi elordadaǵy et bazarlaryna jasaǵan sholýymyzda keltirgen edik.