Іshki naryq otandyq kókónispen jáne kartoppen qamtamasyz etiledi — AShM
ASTANA. KAZINFORM — El aýmaǵyndaǵy aptap ystyqqa qaramastan otandyq kartop ishki naryqqa jetkilikti kólemde jınalmaq. Bul týraly Aýyl sharýashylyǵy vıtse-mınıstri Azat Sultanov málim etti.
Búgin Úkimette ótken baspasóz máslıhatynda jazdaǵy kún raıy otandyq kókónis pen astyq shyǵymyna qanshalyqty áser etýi múmkin ekeni suraldy.
— Negizgi kókónis daqyldary sýarmaly jerlerde ósiriledi, sondyqtan jaǵdaı baqylaýda. Al soltústik óńirler jáne Pavlodardaǵy kartop boıynsha tosyn jaǵdaı bolady dep oılamaımyn. Qazirgi boljamdar boıynsha kókónis pen kartoptyń ortasha shyǵymy bolatyny aıtylyp jatyr. Kartop 2,5–2,6 mln tonna shamasynda bolýy múmkin. Bul kólem ishki naryqty qamtamasyz etýge tolyqtaı jetedi. Sonymen qatar 3,5 mln tonna kókónis jınalmaq, — dedi Azat Sultanov.
Onyń aıtýynsha dándi daqyldardyń jaqsy ónimi eldiń batys óńirinde, sondaı-aq Qostanaı jáne Soltústik Qazaqstan oblystarynda bolýy múmkin. Al Aqmola oblysynyń bir bóligi qurǵaqshylyqqa tap boldy.
Aıta keteıik, búgin týraly Úkimet otyrysynda Premer-mınıstr Oljas Bektenov otandyq ónimge qatysty birqatar tapsyrma berdi.
