Іshki naryq nan óndirýge qajetti shıkizatpen tolyq qamtamasyz etiledi — mınıstrlik

ASTANA. KAZINFORM — 2025 jylǵy astyq eksporty ótken jylmen salystyrǵanda kem bolmaıdy. Bul týraly Ortalyq kommýnıkatsııalar qyzmetinde ótken baspasóz konferentsııasynda QR Aýyl sharýashylyǵy vıtse-mınıstri Azat Sultanov málim etti. 

— 2024-2025 jyldardaǵy marketıngtik maýsymnyń sońynda 13,4 mıllıon tonna astyq eksporttaldy. Bul eksporttyq jetkizilimniń rekordtyq kórsetkishteriniń biri. Biz jańa naryqtarǵa ǵana shyqqan joqpyz, sonymen qatar buryn joǵaltqan baǵyttarǵa da qaıta oralyp jatyrmyz. Qazaqstandyq bıdaı qaıtadan Qyrǵyzstan, Ázerbaıjan jáne Armenııa naryqtaryna iri kólemde jetkizilip jatyr. Keshe Ázerbaıjan Respýblıkasynyń Memleket basshysynyń memlekettik sapary barysynda bul másele erekshe atap ótildi. Bul degenimiz aýyl sharýashylyǵy salasyndaǵy yntymaqtastyq pen ózara taýar aınalymynyń artýyna jol ashady. Bıylǵy ónim kólemin eskere otyryp, eksport kólemi ótken marketıngtik maýsymnan kem bolmaıdy dep boljap otyrmyz. Osylaısha, 12 mıllıon tonnadan astam astyqty eksporttyq áleýet retinde qarastyramyz, — dedi Azat Sultanov.

Vıtse-mınıstrdiń aıtýynsha, ishki naryq makaron, un jáne nan óndirýge qajetti shıkizatpen tolyq qamtamasyz etiledi. Sondaı-aq tuqymdyq materıal tolyq daıyndalyp, mal sharýashylyǵy úshin jem-shóptik astyq qory jetkilikti bolady.

— Eksporttyq jetkizilimder ishki naryqtyń turaqtylyǵyna esh áser etpeıdi, — dep túıindedi Aýyl sharýashylyǵy vıtse-mınıstri.

Buǵan deıin egin jınaý naýqany barysynda 26,4 mln tonna astyq bastyrylǵanyn jazǵanbyz.