Іshki áýe reısterin damytý: zańnamaǵa ózgerister engizý usynyldy
ASTANA. KAZINFORM — Aldaǵy 5 jylda elde aeronavıgatsııanyń ınfraqurylymy túgeldeı jańarady. Bul týraly búgin Úkimet otyrysynda Kólik mınıstri Nurlan Saýranbaev málim etti.
— Tranzıttik áýe saparlary turaqty artyp keledi. Sońǵy 5 jylda bul kórsetkish 4 esege artty. Búginde tranzıt aeronavıgatsııalyq qyzmet kórsetýden túsetin kiristiń negizgi bóligin quraıdy. 2025 jyly áýe qozǵalysyn basqarý júıesin jańǵyrtý úshin amerıkalyq jetekshi LEIDOS korporatsııasymen kelisimshart jasaldy. Aldaǵy 5 jylda aeronavıgatsııanyń ınfraqurylymyn túgeldeı jańartamyz. Bul qazaqstandyq áýe dálizderdiń tıimdiligin arttyrady, — dedi Nurlan Saýranbaev.
Sonymen qatar ol ishki áýe reısterine toqtaldy. 2026 jyly 24 áleýmettik mańyzy bar baǵytty qoldaýǵa 6,4 mlrd teńge josparlandy.
Munymen qosa, týrıstik oryndardy damytýǵa qoldaý kórsetý óńirlik marshrýttardyń damýyna qosymsha serpin beredi.
— Іshki tasymaldardy odan ári damytý úshin zańnamaǵa ózgerister engizý usynylady. Atap aıtqanda, jergilikti organdarǵa oblysaralyq reısterdi óz esebinen sýbsıdııalaýǵa ruqsat berý kerek. Budan bólek, turaqty reısterge qosylǵan qun salyǵyn alyp tastaý qajet, — dedi mınıstr.
Budan buryn habarlanǵandaı, Premer-mınıstr Oljas Bektenov Qazaqstannan tikeleı júretin halyqaralyq reısterdi kóbeıtýdi tapsyrdy.
