Shıvelých janartaýy oıandy: Kamchatkada avıatsııalyq qaýiptiń qyzǵylt sary kody engizildi

ASTANA. KAZINFORM — Kamchatkada Shıvelých janartaýynyń kúl shashýyna baılanysty avıatsııalyq qaýiptiń qyzǵylt sary kody jarııalandy, dep habarlaıdy Sınhýa.

Kamchatkada janartaýdan kúldiń tórt shaqyrym bıiktikke kóterilý qaýpine baılanysty avıatsııalyq qaýiptiń qyzǵylt sary kody jarııalandy. Bul týraly Reseı ǵylym akademııasy Qıyr Shyǵys bólimshesiniń Výlkanologııa jáne seısmologııa ınstıtýtynyń Kamchatkadaǵy janartaý atqylaýyna áreket etý tobyna silteme jasap, RIA Novostı habarlady.

Habarlamada aıtylǵandaı, beısenbi kúni jergilikti ýaqytpen tańǵy saǵat 09:30 shamasynda Shıvelých janartaýy atqylap, tórt shaqyrym bıiktikke deıin kúl kóterilgen. Kúl shleıfi janartaýdan batysqa qaraı 40 shaqyrymǵa sozylǵan. Osyǵan baılanysty Shıvelých janartaýy úshin avıatsııalyq qaýiptiń qyzǵylt sary kody belgilendi.

Shıvelých janartaýy Klıýchı eldi mekeninen 50 shaqyrym soltústikte jáne Petropavlovsk-Kamchatskıı qalasynan 450 shaqyrym qashyqtyqta ornalasqan. Janartaýdyń belsendiligine monıtorıng júrgizilip jatyr.

Kamchatka ólkesi boıynsha Tótenshe jaǵdaılar mınıstrliginiń baspasóz qyzmeti taratqan málimetke sáıkes, kúl shleıfi túbektiń ishki bóligine, ońtústik-batys baǵytta taralyp jatyr.

Budan buryn habarlanǵandaı, Kamchatkada 1952 jyldan bergi eń kúshti jer silkinisi tirkeldi. Túrli derekterge sáıkes, zilzalanyń magnıtýdasy 8,7-ge jetken.

Kamchatkadaǵy jer silkinisinen keıin Klıýchevskaıa Sopka janartaýy atqylaı bastaǵany belgili boldy.