ShYU jalpyálemdik úderisterden shet qalmaýy kerek – Memleket basshysy
ASTANA. KAZINFORM – Qazaqstan ShYU-nyń «Ádiletti álem men kelisim úshin álemdik birlik týraly» bastamasyn birlesip ázirleýdi usyndy. Bul týraly Sınhýa aqparat agenttigine suhbat bergen Memleket basshysy Qasym-Jomart Toqaev aıtty.
«Biz ShYU jalpyálemdik úderisterden shet qalmaýy kerek ekenine senimdimiz. Sondyqtan Qazaqstan ShYU-nyń «Ádiletti álem men kelisim úshin álemdik birlik týraly» bastamasyn birlesip ázirleýdi usyndy. Men bul bastamanyń laıyqty baǵalanyp, barlyq múshe memleketterdiń qoldaýyna ıe bolǵanyna rızamyn. Astanada ótetin sammıtke qatysýshylar halyqaralyq qaýymdastyqty adal jáne ashyq jahandyq dıalogty bastaýǵa, qaýipsizdiktiń jańa paradıgmasyn qabyldaýǵa, ádil ekonomıkalyq orta qurýǵa jáne ǵalamshardyń tazalyǵyn qorǵaýǵa qajetti kúsh-jigerdi jumsaýǵa shaqyrady», - dedi Memleket basshysy.
Prezıdenttiń atap ótýinshe, 2024 jyl Qazaqstannyń bastamasymen ShYU-nyń Ekologııa jyly retinde jarııalandy. Ekologııa, tabıǵı aýmaqtardy qorǵaý, ekotýrızm, klımattyń ózgerýine qarsy kúres salasyndaǵy halyqaralyq qujattar ázirlenip, qabyldaýy josparlanyp otyr.
Bıyl aqpan aıynda BUU-nyń qorshaǵan ortany qorǵaý assambleıasy 6-sessııasy aıasynda Qazaqstan bastamasymen ótken ShYU-BUU joǵary deńgeıdegi «Bir ǵalamshar, bir bolashaq: ekologııalyq turaqtylyq úshin kúsh-jigerdi biriktirý» arnaıy is-sharasy kópshiliktiń nazaryn aýdardy. Onyń qorytyndysynda ShYU men UNEP (BUU-nyń qorshaǵan orta salasyndaǵy basty organy) arasynda qarym-qatynas ornatylyp, ShYU-ǵa múshe memleketterdiń Úkimetteri arasynda qorshaǵan ortany qorǵaý salasyndaǵy yntymaqtastyq týraly kelisimge qol qoıý josparlanǵan.
«ShYU ekologııalyq problemalar men klımattyń ózgerýine tıimdi áreket etýge qabiletti ekenine senimdimin. «Adamzattyń ortaq taǵdyry» qoǵamdastyǵy týraly aıta kele, bul jańashyl tujyrymdama búkil álem qaýymdastyǵynyń nazaryn aýdarǵanyn, halyqaralyq qatynastyń jańa modelin qalyptastyrýǵa negiz bolǵanyn erekshe atap ótkim keledi. Onyń maqsaty – qazirgi zamanǵy memleketaralyq qatynastarda jetispeıtin ózara tıimdi yntymaqtastyq pen senimdi dıalogty ornatý. Osy turǵyda «adamzattyń ortaq taǵdyry» qoǵamdastyǵy ıdeıasy men «Shanhaı rýhy» qaǵıdattary úndes jáne bir-birin úılesimdi tolyqtyra alar edi. Bul, ásirese, eki tujyrymdamanyń turaqty damýǵa, ortaq gúldenýge, ashyqtyq pen ınklıýzıvtilikke umtylýyna qatysty. Osy taǵdyrsheshti kontseptilerdi kópjaqty qurylymdar aıasynda jáne ekijaqty deńgeıde ilgerilete otyryp, álemdik qoǵamdastyq olardy halyqaralyq qatynastardaǵy normaǵa aınaldyra alatynyna senimdimin», - dedi Qasym-Jomart Kemeluly.
