ShYU sheshimderdi is júzinde júzege asyrýǵa nazar aýdarady — qytaılyq sarapshynyń pikiri
ASTANA. KAZINFORM — 26-shy Shanhaı yntymaqtastyq uıymyna múshe memleketter basshylary keńesiniń Bishkekte ótken otyrysy ózara is-qımyldyń barǵan saıyn praktıkalyq ári jan-jaqty sıpat alyp kele jatqanyn kórsetti. Bul pikirdi Kazinform agenttiginiń Beıjińdegi menshikti tilshisine bergen túsiniktemesinde «Qytaı – ShYU» saýda-ekonomıkalyq ınstıtýtynyń vıtse-prezıdenti, professor Shen Lı bildirdi.
— Bishkektegi ShYU sammıti Tıantszın bastamalaryn praktıkalyq júzege asyrý, ınstıtýtsıonaldyq-quqyqtyq tetikterdi jetildirý jáne uıymnyń 25 jyldyq qyzmetin qorytyndylaǵannan keıin bolashaq basymdyqtardy anyqtaý arqyly buryn qabyldanǵan sheshimderge negizdelip otyr, — dep atap ótti sarapshy.
Ol ótken jyly ShYU kóshbasshylary qaýipsizdik, ekonomıka jáne turaqty damý salasyndaǵy yntymaqtastyqtyń uzaq merzimdi baǵytyn belgilegen Tıantszın deklaratsııasy men ShYU-nyń 2035 jylǵa deıingi damý strategııasyn qabyldaǵanyn eske saldy.
— Árıne, lańkestik pen transulttyq qylmysqa qarsy kúres ShYU-nyń basty basymdyqtarynyń biri bolyp qala beredi, alaıda sońǵy shırek ǵasyrda uıymnyń kún tártibi saýda, ınvestıtsııa, energetıka, qorshaǵan orta jáne kıberqaýipsizdik salalaryn qamtı otyryp, yntymaqtastyqty praktıkalyq jáne jan-jaqty etti, — dep atap ótti ol.
Onyń aıtýynsha, ShYU-nyń úzdiksiz tabysty damýynyń negizgi faktory — qujattarda bekitilgen sheshimderdi iske asyrý arqyly onyń ınstıtýtsıonaldyq tıimdiligin arttyrý.
— Bishkektegi ShYU-nyń 26-shy sammıtiniń negizgi maqsaty — «Shanhaı rýhyn» saqtaý, ózara yntymaqtastyq tetikterin nyǵaıtý jáne kelisimderdi naqty nátıjelerge aınaldyrý qajettiligi, — dep qorytyndylady professor Shen Lı.
Osyǵan deıin Qazaqstan prezıdenti Qyrǵyzstan Shanhaı yntymaqtastyq uıymyna tabysty tóraǵalyq etkenin aıryqsha atap ótkenin jazdyq.
