ShYU sammıtine baılanysty Bishkek turǵyndaryna qaladan ýaqytsha ketýge keńes berildi
ASTANA. KAZINFORM — Shanhaı yntymaqtastyq uıymynyń sammıti jáne VI Dúnıejúzilik kóshpendiler oıyndarynyń ashylý saltanaty Qyrǵyzstan astanasynda 30 tamyz ben 1 qyrkúıek aralyǵynda ótedi, dep habarlaıdy Kazinform agenttiginiń Bishkektegi tilshisi.
El Prezıdentiniń baspasóz hatshysy Asqat Alagózov resmı túrde Bishkek turǵyndaryna bul kúnderdi múmkindiginshe Ystyqkólde nemese basqa demalys oryndarynda ótkizýge shaqyrdy.
Ol Qyrǵyzstanǵa alǵash ret 21 memleket basshysy bir ýaqytta keletinin, olardyń keıbiri resmı memlekettik saparmen keletinin atap ótti. Bishkekte úsh kún boıy joldar jıi jabylyp, qolaısyzdyq týdyrýy múmkin.
— Mektep oqýshylary men ýnıversıtet stýdentteri úshin sabaq 15 qyrkúıekten bastalady. Sondyqtan 1 qyrkúıekke deıin Bishkekke asyǵys oralýdyń qajeti joq. Qyrǵyzstan turǵyndary demalystaryn 15 qyrkúıekke deıin aldyn ala josparlaı alady, — dep qosty ol.
Aıta keteıik, Qyrǵyzstan bıyl Shanhaı yntymaqtastyq uıymynyń aınalmaly tóraǵalyǵyn ıelenip, ShYU sammıtin ótkizýge daıyndalyp jatyr.
Sonymen qatar, VI Dúnıejúzilik kóshpendiler oıyndary 31 tamyz ben 6 qyrkúıek aralyǵynda ótedi, oǵan 90 el qatysady. Ashylý saltanaty el astanasynyń jańa stadıonynda ótedi.
Buǵan deıin BUU Bas hatshysy Antonıý Gýterrıshtiń Bishkekte ótetin ShYU sammıtine qatysatynyn habarlaǵan bolatynbyz.
El «Shanhaı yntymaqtastyq uıymynyń 25 jyldyǵy» atty kúmis kollektsııalyq monetany aınalymǵa engizdi.
Bishkekte Shanhaı yntymaqtastyq uıymyna múshe memleketter Qaýipsizdik keńesi hatshylarynyń 21-shi kezdesýi jáne ShYU elderiniń ǵylym jáne tehnologııa mınıstrlikteri men vedomstvolary basshylarynyń 10-shy kezdesýi ótken bolatyn.
