ShYU sammıti ótip jatqanda terrorıstik qaýiptiń «sary» deńgeıi engiziledi — UQK
ASTANA. KAZINFORM — Ulttyq qaýipsizdik komıteti 2-5 shilde aralyǵynda Astanada ótetin Shanhaı Yntymaqtastyq Uıymynyń sammıtine oraı turǵyndarǵa úndeý jasady.
«Qurmetti astananyń, Almaty, Qaraǵandy jáne Kókshetaý qalalarynyń turǵyndary men qonaqtary! Qazaqstanda shildeniń 2-5 aralyǵynda birqatar mańyzdy halyqaralyq is-sharalar, onyń ishinde Shanhaı Yntymaqtastyq Uıymyna múshe memleketter basshylarynyń keńesi men Qytaı Halyq Respýblıkasy tóraǵasynyń memlekettik resmı sapary ótedi. Osyǵan oraı álemge belgili tájirıbege sáıkes ýákiletti memlekettik organdar keletin sheteldik delegatsııalardyń, olardyń ishinde memleket basshylary men halyqaralyq uıymdar basshylarynyń qaýipsizdigin joǵary deńgeıde qamtamasyz etýge tolyqqandy sharalar qabyldaıdy. Terrorızmge qarsy is-qımyl týraly zańnyń 12, 13 jáne 15-baptaryna sáıkes kúzetiletin tulǵalardyń qaýipsizdigin qamtamasyz etý boıynsha kúzet is-sharalaryn ótkizý kezinde Terrorızmge qarsy kúres respýblıkalyq jedel shtabtyń basshysy retinde Qazaqstan Respýblıkasy Memlekettik kúzet qyzmeti bastyǵynyń sheshimimen Astana, Almaty, Qaraǵandy jáne Kókshetaý qalalarynyń jekelegen ýchaskelerinde terrorızmge qarsy operatsııanyń quqyqtyq rejıminde quqyqtyq tártip pen qoǵamdyq qaýipsizdikti qoldaý is-sharalary ótedi» dep eskertedi komıtetten.
Quqyqtyq rejım 2 shilde 00:01–den bastap 4 shilde 23:59–ǵa deıin Shanhaı Yntymaqtastyq Uıymynyń sammıti ótkiziletin obektiler aýmaǵyna jáne kúzetiletin tulǵalardyń júrý baǵyttarynda engiziledi.
Kúzetiletin tulǵalardyń Aqmola, Qaraǵandy oblysy men Almaty qalasy aýmaǵyna kelgen jaǵdaıda olar kelgen kezeńge jáne atalǵan óńirlerge bolatyn oryndaryna terrorızmge qarsy operatsııanyń quqyqtyq rejımi jarııalanady.
Terrorızmge qarsy operatsııa ótkizý aımaqtarynda kúzetiletin tulǵalar bolǵan kezeńderinde ol aımaqtarda adamdardyń jáne avtokólikterdiń qozǵalysyna shekteý qoıylady.
Kúzetiletin tulǵalar júretin arnaıy trassa ýchaskelerinde qalalyq jolaýshylar kóliginiń qozǵalysy toqtatylady.
Tıisti baǵdarlardaǵy ózgerister jaıynda Astana qalasynyń ákimdigi habarlaıdy.
«Budan basqa, Qazaqstan Prezıdentiniń 2013 jylǵy 9 tamyzdaǵy № 611 Jarlyǵymen bekitilgen „Terrorızm aktisi qateriniń týyndaýy týraly aqparat monıtorınginiń jáne halyqty habardar etýdiń memlekettik júıesiniń uıymdastyrylýy men jumys isteý qaǵıdalaryna“ sáıkes terrorızmge qarsy operatsııanyń quqyqtyq rejımi engizilýin eskere otyryp, Astana, Almaty, Qaraǵandy jáne Kókshetaý qalalarynyń Shanhaı yntymaqtastyq uıymynyń sammıtin ótkizý obektilerinde 2 shilde 00:01–den bastap 4 shilde 23:59–ǵa deıin terrorıstik qaýiptiń birqalypty („sary“) deńgeıi belgilenedi. Birqalypty deńgeı ýákiletti memlekettik organdardyń uıymdastyrýshylyq, ákimshilik jáne jedel is-sharalar keshenin ótkizýdi kózdeıdi» dep eskertedi UQK.
Atap aıtqanda:
— jekelegen aýmaqtarda kólik quraldary men jaıaý júrginshilerdiń qozǵalysyna shekteý engizedi;
— kınologııa qyzmetiniń mamandaryn tarta otyryp, kóshelerde, alańdarda, stadıondarda, skverlerde, saıabaqtarda, magıstraldi temirjol jelilerinde, temirjol vokzaldarynda, avtovokzaldarda, áýejaılarda, metropolıten obektilerinde, buqaralyq jáne jappaı is-sharalar ótetin oryndarda patrýldi kúsheıtedi;
— jarylǵysh qurylǵylardy anyqtaý jáne joıý boıynsha terrorıstik turǵydan osal obektilerge jáne adamdar kóp jınalatyn oryndarǵa, buqaralyq jáne jappaı is-sharalarǵa qatysýshylardyń qozǵalýlarynyń negizgi baǵdarlaryna tekserý júrgizedi;
— áýejaılarda, metropolıten obektilerinde, temirjol vokzaldarynda jáne avtovokzaldarda jete tekserý is-sharalaryn ótkizý barysynda arnaıy tehnıka quraldaryn paıdalaný arqyly rejımdik sharalardy kúsheıtedi.
«Arnaıy memlekettik jáne quqyq qorǵaý organdarynyń jumysyna túsinikpen qaralaýlaryńyzdy jáne olardyń qyzmetkerleriniń zańdy talaptaryn saqtaýdy suraımyz» deıdi vedomstvodan.
