ShYU sammıti kúzde Qytaıdyń Tıantszın qalasynda ótedi
ASTANA. KAZINFORM – XIV shaqyrylymdaǵy Búkilqytaılyq halyq ókilderi jınalysynyń úshinshi sessııasy 7 naýryz baspasóz máslıhatyn ótkizdi. Onda Qytaıdyń syrtqy ister mınıstri Van I eldiń syrtqy saıasaty men halyqaralyq qatynastar boıynsha suraqtarǵa jaýap berdi.

Bul týraly The Paper aqparattyq agenttigi habarlady.
Van I bıyl Shanhaı yntymaqtastyq uıymy (ShYU) úshin «Qytaı jyly» ekenin atap ótti. «ShYU Qytaıda ómirge keldi, Shanhaıdyń atymen ataldy, bul biz úshin aıryqsha mánge ıe. Biz ShYU-nyń óz otanyna oralǵanyn qýana qarsy alamyz» dedi mınıstr.
Onyń aıtýynsha, ShYU-nyń turaqty damýynyń negizgi sebebi «Shanhaı rýhyn» ustanyp, ózara senim men tıimdilik, teńquqylyq pen ózara aqyl-keńes, mádenı ártúrlilikke qurmet jáne ortaq damýǵa umtylys qaǵıdattaryn saqtaı bilýinde. Sonyń arqasynda uıym óńirlik yntymaqtastyqtyń jańa modelin qalyptastyrdy.
- Aldaǵy kúzde ShYU sammıti Qytaıdyń Tıantszın qalasynda ótedi. ShYU-na múshe elderdiń basshylary Haıhe jaǵalaýynda bas qosyp, tabysty tájrıbelerdi qorytyndylap, damý baǵytyn aıqyndap, ortaq sheshimder qabyldaıdy. Uıym Qytaıda qaıta qanattanyp, ShYU keńistiginde ortaq taǵdyr qaýymdastyǵyn qalyptastyrýǵa serpin beriledi, – dedi Van I.
Qytaı ShYU aıasyndaǵy yntymaqtastyqty 8 baǵyt boıynsha ilgeriletetini týraly jazdyq.