ShYU sammıti: El basshylaryn qarsy alý rásimi aıaqtaldy
ASTANA. KAZINFORM – Astanadaǵy Táýelsizdik saraıynda Shanhaı yntymaqtastyq uıymynyń sammıtine qatysýshylardy qarsy alý rásimi aıaqtaldy.
Eń aldymen Memleket basshysy Qasym-Jomart Toqaev Úndistan Respýblıkasynyń Syrtqy ister mınıstri Sýbramanıam Djaıshankardy qarsy aldy jáne qol alysyp, sýretke tústi. Osydan keıin Prezıdent mártebeli meımandy konferentsııa zalyna shyǵaryp saldy.
Odan keıin Táýelsizdik saraıyna Qyrǵyz Respýblıkasynyń prezıdenti Sadyr Japarov keldi. Baýyrlas elderdiń basshylary rásim kezinde az-kem tildesip úlgerdi.
Sonymen birge ShYU sammıtine Pákistan Islam Respýblıkasynyń Premer-Mınıstri Shahbaz Sharıf keldi. Qazaqstan men Pákistan uıymdar arasyndaǵy ózara is-qımylyn, sondaı-aq ekijaqty saýda-ekonomıkalyq, kólik-logıstıkalyq jáne gýmanıtarlyq yntymaqtastyǵyn damytyp keledi. IT ındýstrııa jáne qarjy salasy da perspektıvaly baǵyttar bolyp sanalady.
Sammıt qonaqtary arasynda Iran Prezıdentiniń mindetin atqarýshy Mohammad Mohbara bar. Mamyr aıynda Iran Prezıdenti Ibragım Raısıdiń mezgilsiz qaza tabýyna baılanysty, elde saılaý júrip jatyr. Ótken jyly Iran ShYU-daǵy baıqaýshy-memleket mártebesinen tolyqqandy múshelikke aýysqan edi.
Odan keıin Táýelsizdik saraıyna Ózbekstan Respýblıkasynyń Prezıdenti Shavkat Mırzıeev keldi.
Sondaı-aq QR Prezıdenti Tájikstan Respýblıkasynyń Prezıdenti Emomalı Rahmonmen qol alysty.
Shara qonaqtarynyń biri – Belarýs Respýblıkasynyń Prezıdenti Aleksandr Lýkashenko. Bıylǵy sammıtte Belarýs ShYU tolyqqandy múshesi bolady.
Qazaqstannyń tatý kórshisi – Reseı Federatsııasynyń Prezıdenti Vladımır Pýtın Táýelsizdik saraıyna óz kóligimen keldi. Prezıdent Qasym-Jomart Toqaev sýretke túsý rásiminen keıin meımandy konferentsııa zalyna shyǵaryp saldy.
Taǵy bir mańyzdy qonaqtardyń biri – Qazaqstanǵa 2 shilde kúni memlekettik saparmen kelgen QHR Tóraǵasy Sı Tszınpın. Prezıdent Qasym-Jomart Toqaev meımanmen qol alysý rásiminen keıin biraz qytaı tilinde áńgimelesti.
Qarsy alý rásiminen soń uıymǵa múshe memleketterden kelgen delegatsııalardyń basshylary birlesip sýretke tústi.
Aıta ketý kerek, is-sharaǵa Qazaqstan, Iran, Qytaı, Qyrǵyzstan, Pákistan, Reseı, Tájikstan, Ózbekstan, Belarýs, Mońǵolııa, Ázerbaıjan, Qatar, BAÁ, Túrkııa jáne Túrikmenstan memleketteri men úkimetteriniń basshylary, Úndistan Respýblıkasynyń Syrtqy ister mınıstri, sondaı-aq BUU Bas hatshysy, ShYU Bas hatshysy men ShYU Óńirlik terrorızmge qarsy qurylymynyń atqarýshy dırektory, TMD, EYU, AÓSShK, UQShU, EEK jáne AQIU sııaqty halyqaralyq uıymdardyń basshylary qatysady.
ShYU sammıti alǵash ret «ShYU-ǵa múshe memleketter basshylary keńesiniń otyrysy» jáne «ShYU+» kezdesýi formatynda ótedi.
Eske salsaq, 3-4 shilde kúnderi Astanada Shanhaı yntymaqtastyq uıymynyń sammıti ótip jatyr. Búgingi otyrysta ShYU-ǵa múshe memleketter basshylary saıası, saýda-ekonomıkalyq jáne mádenı-gýmanıtarlyq salalardaǵy yqpaldastyqtyń kóptegen ózekti máselesin qarastyrady.
Astana sammıtinen bastap Shanhaı yntymaqtastyq uıymy tolyqqandy «Shanhaı ondyǵy» formatynda jumys isteıdi. Bul týraly Qytaıdyń Sınhýa aqparat agenttigine suhbat bergen Memleket basshysy Qasym-Jomart Toqaev aıtty.
Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.
Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty.
