ShYU óńirde ortaq ekologııalyq qaýipsizdik beldeýin qalyptastyrýdy kózdeıdi
ASTANA. KAZINFORM – Shanhaı yntymaqtastyq uıymynyń jasyl jáne turaqty damý jónindegi forýmy Qytaıdyń shyǵysyndaǵy Nınbo qalasynda ashyldy. Bul týraly Sınhýa agenttigi jazdy.
Forým Chjetszıan provıntsııasynda ótti. Іs-sharada Qytaı Halyqtyq saıası konsýltatıvtik keńesiniń Búkilqytaılyq komıteti tóraǵasynyń orynbasary, ShYU-nyń Tatý kórshilik, dostyq jáne yntymaqtastyq jónindegi komıtetiniń tóraıymy Shen ıÝeıýe QHR tóraǵasy Sı Tszınpınniń quttyqtaý hatyn oqyp, negizgi baıandama jasady.
Shen ıÝeıýe ShYU elderiniń jasyl jáne turaqty damýdy birlesip ilgeriletýi uıymǵa múshe memleketterdiń ortaq umtylysy ári yntymaqtastyqtyń mańyzdy baǵyty ekenin atap ótti. Onyń aıtýynsha, bul baǵytta jahandyq basqarý bastamalaryn iske asyryp, jasyl jáne turaqty damý salasynda ortaq kelisim qalyptastyrý qajet.
Sondaı-aq ol ǵylymı-tehnıkalyq ınnovatsııalardy jedeldetý arqyly jasyl damýdyń ishki qozǵaýshy kúshterin arttyrý, óndiristik salalar arasyndaǵy yqpaldastyqty kúsheıtý arqyly jasyl ekonomıkadaǵy yntymaqtastyq negizin nyǵaıtý, ekologııalyq talaptardy qatań saqtap, óńirde ortaq ekologııalyq qaýipsizdik beldeýin qalyptastyrý mańyzdy ekenin aıtty.
Budan bólek, Shen ıÝeıýe ShYU elderin mádenı-gýmanıtarlyq baılanystardy tereńdetýge shaqyryp, bul jasyl jáne turaqty damý maqsattaryna birlesip qol jetkizýge múmkindik beretinin jetkizdi.
Aıta keteıik, ShYU elderinen Qazaqstanǵa kelgen týrıster sany 14,8 mln adamǵa jetkenin jazdyq.
