«ShYU ondyǵy»: Belarýsti uıym quramyna qabyldaý týraly qujattar rásimdeldi

ASTANA. KAZINFORM – Elordadaǵy Táýelsizdik saraıynda ótip jatqan Shanhaı yntymaqtastyq uıymynyń sammıtinde múshe memleketterdiń basshylary Belarýs Respýblıkasyn Uıym múshelegine qabyldaýǵa qatysty birqatar qujatqa qol qoıdy.

«Shanhaı rýhyn nyǵaıtý jáne Shanhaı prıntsıpterin ilgeriletý arqyly biz ShYU-ny eń bedeldi halyqaralyq qurylymdardyń birine aınaldyrdyq. Bizdiń birlestigimizdiń biregeıligi men orasan zor áleýetiniń arqasynda álemde oǵan degen qyzyǵýshylyq turaqty túrde artyp keledi. Búgin Astanadaǵy sammıtte uıymymyzdy odan ári keńeıtý týraly mańyzdy sheshim qabyldanady. Osyǵan baılanysty Belarýs Respýblıkasynyń Prezıdenti qurmetti Aleksandr Grıgorevıch Lýkashenkoǵa qosh keldińiz demekpin», - dedi sammıt barysynda Qazaqstan Prezıdenti.

Memleket basshysynyń atap ótýinshe, Belarýs ShYU-ǵa tolyqqandy múshe bolý jolynda qajetti rásimderdiń bárin oryndaǵan.

«Eger qarsylyq bolmasa otyrysty Belarýs Respýblıkasyn ShYU-ǵa múshe memleketterdiń quramyna qabyldaý týraly qujattarǵa qol qoıý rásiminen bastasaq», - dep usynys jasady Qasym-Jomart Toqaev.

Osydan keıin ShYU-ǵa múshe memleketterdiń basshylary Belarýs Respýblıkasyn Uıym quramyna qabyldaýǵa baılanysty birqatar qujatqa qol qoıdy.

Belarýs Respýblıkasy 2010 jyldan beri Shanhaı yntymaqtastyq uıymyna qatysyp keledi. Bastapqyda dıalog boıynsha áriptes boldy, keıin baqylaýshy mártebesin aldy. Osy sammıt qarsańynda el Prezıdenti Aleksandr Lýkashenko agenttik tilshisine eksklıýzıvti suhbat bergen bolatyn.

Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.
Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty. El basshylaryn qarsy alý rásimi aıaqtaldy. Belarýs Respýblıkasy ShYU-ǵa tolyqqandy múshe retinde qabyldandy.