ShYU-nyń damýyna Astana deklaratsııasynyń yqpaly bolady - sarapshy
ASTANA. KAZINFORM – Qazaqstan Shanhaı yntymaqtastyq uıymy qurylǵannan beri uıymnyń damýyna eleýli úlesin qosyp keledi. Búgin qabyldanǵan Astana deklaratsııasy uıymnyń damýyna yqpal etpek. Qazaqstan qoǵamdyq damý ınstıtýtynyń sarapshysy Damır Belgibaev osylaı dep oı bólisti.
«Astanada ótip jatqan ShYU sammıti osy uıymnyń jańa deńgeıge shyǵyp jatqanyn baıqatyp otyr. Óıtkeni, Qazaqstan bul uıym qurylǵannan beri damýyna eleýli úlesin qosyp keledi. ShYU osyǵan deıin saıası jáne basqa da taqyryptarda dıalog alańy bolsa, budan keıin kóptegen máseleni sheshýge qaýqarly úlken uıymǵa aınalady. Bul uıymnyń abyroıy men damýyna búgingi Astana deklaratsııasynyń da yqpaly bolady. Qazaqstan uıymǵa tóraǵalyǵy barysynda bir jyl ishinde 150-den astam is-shara uıymdastyryp, aýqymdy jumys atqaryldy. ShYU-da sharttyq baza 60 jańa qujatpen tolyqty. Sonyń arasynda ekonomıkalyq, mádenı, ekologııalyq qaýipsizdik, kólik, tehnologııa salasyndaǵy taqyryptar qamtyldy. Ol qujattar el ekonomıkasynyń ary qaraı damýyna úles qosady», - dedi D. Belgibaev Kazinform tilshisine bergen suhbatynda.
Onyń aıtýynsha, Qazaqstan óziniń tatýlastyrýshy bitimgerlik bastamalarynyń arqasynda aýqymdy máselelerge óz úlesin qosty. Sondyqtan ShYU-daǵy tóraǵalyǵy kezinde de elimiz qaýipsizdik taqyrybyn aldyńǵy orynǵa qoıdy.
Munymen qosa sarapshy Shanhaı yntymaqtastyq uıymynyń sammıtine BUU Bas hatshysy Antonıý Gýterrıshtiń kelýine oraı pikirin bildirdi.
«ShYU quramyndaǵy memleketter sanynyń artýyna baılanysty, uıymnyń aýmaǵy keńeıip keledi, ıaǵnı álemdik uıym retinde tanylǵanyn aıtýǵa bolady. Qazaqstan tóraǵalyq etken jyldarda uıymǵa jańa memleketter qosylyp otyrdy. Atap aıtqanda, uıymǵa alpaýyt memleketter múshe boldy. Búgingi sammıtke BUU Bas hatshysynyń kelýi Qazaqstannyń álemdik arenadaǵy bedeliniń kórinisi dep sanaımyn. Meniń oıymsha, onyń sapary álemdegi eleýli problemalardy birigip sheshýdiń joldaryn tabýǵa arnalǵan», - dedi Damır Belgibaev.
Aıta keteıik, búgin Shanhaı yntymaqtastyq uıymy sammıtinde Astana deklaratsııasy qabyldandy. Qujatqa uıymǵa múshe memleketterdiń basshylary qol qoıdy.
Sonymen qatar, Shanhaı yntymaqtastyq uıymyna múshe memleketter basshylary keńesiniń otyrysy barysynda birqatar qujat bekitildi.
Shanhaı yntymaqtastyq uıymynyń baspasóz qyzmeti Astana deklaratsııasynyń mańyzdy tustaryn jarııalady. Onda uıymǵa múshe memleketter jalpyǵa ortaq beıbitshilikti, qaýipsizdik pen turaqtylyqty nyǵaıtý úshin jaǵdaı jasaýdaǵy, sondaı-aq jańa demokratııalyq, ádiletti, saıası jáne ekonomıkalyq halyqaralyq tártipti qurýdaǵy ShYU rólin arttyrý qajet ekenin atap ótken.
«Múshe memleketter Uıymnyń bedelin odan ári nyǵaıtýǵa, onyń qyzmetin jetildirýge jáne kóp qyrly ózara tıimdi yntymaqtastyqty damytýǵa yqpal etken Qazaqstan Respýblıkasynyń 2023-2024 jyldardaǵy ShYU-ǵa tóraǵalyǵynyń nátıjelerin joǵary baǵalady», - delingen.
