ShYU-nyń artyqshylyqtary geosaıası úderisterge yqpal etýge múmkindik beredi — uıym basshysy
ASTANA. KAZINFORM - Dúısenbi kúni Qytaı astanasy Beıjińdegi ShYU hatshylyǵynda uıymnyń bas hatshysy Nurlan Ermekbaev qazirgi syn-qaterler jaǵdaıynda uıymnyń birqatar artyqshylyǵyn atap ótti, dep habarlaıdy Kazinform agenttiginiń menshikti tilshisi.
Halyqaralyq uıym basshysy bul pikirin «Ózgerister kezeńindegi birlik: jahandyq syn-qaterler men ornyqty damýǵa tóngen qaýipter jónindegi ShYU dıalogy» atty dóńgelek ústel qarsańyndaǵy baspasózge arnalǵan brıfıngte aıtty.
— ShYU-nyń ózine tán erekshelikteri men artyqshylyqtary bar. Uıymǵa múshe memleketterdiń barlyǵy — Eýrazııa elderi. Olar bir qurlyqta ornalasqan, qurlyq arqyly ózara baılanysqan, tarıhı ári mádenı turǵydan tyǵyz qarym-qatynasta, — dedi ol.
Onyń aıtýynsha, ShYU aıasynda túrli baǵyttaǵy yntymaqtastyq tetikteri jumys isteıdi. Atap aıtqanda, mınıstrlikter, vedomstvolar, joǵarǵy sottar, bas prokýratýralar, qorshaǵan orta, syrtqy ekonomıkalyq jáne saýda, ǵylym men tehnologııa salalaryndaǵy ortalyq memlekettik organdar arasynda turaqty kezdesýler ótkiziledi. Jalpy sany — 29 tetik.
— Bul tetikterdiń barlyǵy naqty nátıje berip otyr. Sonyń arqasynda ShYU qazirgi álemdegi geosaıası jáne geoekonomıkalyq úderisterge yqpal ete alady, — dep qosty ol.
Reseı prezıdentiniń ornyqty damý maqsattaryna qol jetkizý jónindegi halyqaralyq uıymdarmen baılanys boıynsha arnaıy ókili Borıs Tıtov Qazaqstannyń Shanhaı yntymaqtastyq uıymyndaǵy rólin erekshe atap ótti.
— ShYU — teń quqyly seriktester qaýymdastyǵy. Uıymdaǵy jetekshi elder Qytaı men Reseı, sondaı-aq Qazaqstan, Pákistan, Úndistan sııaqty memleketter onyń damýyna zor úles qosyp otyr, — dedi ol.
Dóńgelek ústeldiń maqsaty — Birikken Ulttar Uıymy baǵdarlamalaryn óńirlik saraptamamen tolyqtyrý. Talqylaýdyń negizgi taqyryby — ShYU-ǵa múshe elderdiń erekshelikteri men basymdyqtaryn eskere otyryp, ornyqty damý maqsattaryn iske asyrý.
Buǵan deıin ShYU baıqaýshylar mıssııasy jańa Konstıtýtsııa boıynsha ótken referendýmnyń uıymdastyrylýyn joǵary baǵalaǵany habarlanǵan bolatyn.
