ShYU mıssııasy: Qazaqstandaǵy referendýmda jastar belsendi boldy

ASTANA. KAZINFORM — Shanhaı yntymaqtastyq uıymy (ShYU) mıssııasynyń basshysy Oleg Kopylov Qazaqstanda ótken referendýmnan keıingi baıqaýshylardyń qorytyndysyn jarııalady. 

Onyń aıtýynsha, Qazaqstan Respýblıkasy halyqaralyq baıqaýshylardy shaqyrý arqyly eldiń jańa Konstıtýtsııasyn qabyldaý jónindegi respýblıkalyq referendýmnyń barynsha ashyqtyǵyn qamtamasyz etýge jaǵdaı jasady.

— Bizdiń mıssııamyzdyń quramynda ShYU-ǵa múshe elderden 17 baıqaýshy akkredıtteldi, olardyń ishinde ShYU memleketterindegi zań shyǵarýshy, atqarýshy jáne saılaý organdarynyń tájirıbeli ókilderi, sondaı-aq ShYU hatshylyǵynyń laýazymdy adamdary, ShYU-ǵa múshe memleketterdiń syrtqy saıası vedomstvolarynyń ókilderi boldy. Bıylǵy 12 naýryzda bizdiń mıssııa óz jumysyna kiristi, — dedi Oleg Kopylov elordada tilshiler suraǵyna jaýap bere otyryp.

Onyń aıtýynsha, daýys berý kúni mıssııa músheleri referendým ýchaskelerine tańerteń baryp, bıýlletender daıyndaý jáne daýys berý jáshikterin ornalastyrý rásimderin nazarǵa aldy.

— Daýys berý kúni mıssııa músheleri 81 ýchaskege bardy. Mıssııa baıqaýshylary qandaı da bir atqarýshy organdarynyń kelisiminsiz óz tańdaýy boıynsha ýchaskelerdi aralap shyqty. Mıssııa músheleriniń ýchaskelerge barýyna eshqandaı kedergi bolǵan joq. Jalpy, bizdiń baıqaýshylar turǵyndardyń joǵary azamattyq belsendiligin jáne respýblıkalyq referendým ótkizýdi uıymdastyrýdaǵy ýchaskelik komıssııa qyzmetkerleriniń kásibıligin atap ótti. Referendým ótkizý úshin barlyq qajet jaǵdaı jasaldy, beıtaraptyq qaǵıdaty saqtaldy. Ýchaskelik komıssııalardyń qyzmetine bilikti, jumysyn ashyq kórsete alatyn, zańnama talaptaryna saı qyzmet ete alatyn adamdar tartylǵanyn baıqadyq. Ýchaskelik komıssııalarda tolyq kólemde aqparattyq-anyqtamalyq materıaldar, tirkeý jýrnaldary, ádistemelik jınaqtar, kezekshilik kesteleri jáne basqa da qajet qujattar usynyldy, — dedi Shanhaı yntymaqtastyq uıymy mıssııasynyń basshysy

Onyń sózine qaraǵanda, daýys berý kúninde jastar referendýmǵa belsendi qatysqan.

— Osylaısha, mıssııa Qazaqstan Respýblıkasynyń jańa Konstıtýtsııasyn qabyldaý jónindegi respýblıkalyq referendým eldiń saılaý zańnamasynyń talaptaryna jáne el qabyldaǵan halyqaralyq mindettemelerge sáıkes kelgenin resmı málimdeıdi, — dedi Oleg Kopylov.

Aıta keteıik, 15 naýryzda Qazaqstanda jańa Ata Zańnyń jobasy boıynsha jalpyulttyq referendým ótti. 

Bıyl 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalandy.

Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy. 

Respýblıkalyq referendýmda berilgen bıýlletende «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal qoıyldy.

Ortalyq referendým komıssııasynyń málimetine qaraǵanda, Qazaqstanda daýys berý quqyǵy bar azamattardyń 73 paıyzdan astamy óz tańdaýyn jasady. 

Birinshi exit poll nátıjesine qaraǵanda, referendýmda halyqtyń 86,7%-y jańa Konstıtýtsııany qoldady.