ShYU Qorǵanys mınıstrleriniń keńesi: Bizdiń uıym – áskerı-saıası blok emes
ASTANA. KAZINFORM – Astanada Shanhaı Yntymaqtastyq Uıymyna múshe elderdiń qorǵanys mınıstrleriniń keńesi ótti.
Keńeste halyqaralyq jáne óńirlik qaýipsizdiktiń ózekti máseleleri talqylanyp, qorǵanys vedomstvolary arasyndaǵy yntymaqtastyqty damytý qadamdary aıqyndaldy.
Sondaı-aq, ShYU-nyń áskerı-saıası blok emestigi, saladaǵy ózara is-qımyl basqa elderge qarsy baǵyttalmaǵany aıtyldy.
Keńes qyzmeti áskerı saladaǵy senim sharalaryn nyǵaıtýǵa, óńirlik qaýipsizdiktiń syn-tegeýrinderi men qaterlerine qarsy is-qımyl jónindegi kúsh-jigerdi úılestirýge baǵyttalǵan. Osyǵan baılanysty «Beıbit mıssııa» terrorızmge qarsy birlesken áskerı oqý-jattyǵýlaryn ótkizýdi jalǵastyrý qajettigi sóz boldy.
Qorǵanys vedomstvolarynyń basshylary uıymǵa múshe memleketter qarýly kúshteriniń qyzmetin nasıhattaý úshin áskerı-tarıhı murajaılar arasyndaǵy ózara is-qımyldy damytýǵa kelisti.
Qazaqstannyń Qorǵanys mınıstri Rýslan Jaqsylyqov uıymnyń tarıhyna toqtalyp, keleshigimen baılanysty usynystar aıtty.
Atap aıtsaq, senim sharalary týraly kelisimdi ázirleýdi jáne qabyldaý usynyldy.
Keńes qorytyndysy boıynsha hattama men yntymaqtastyqty retteıtin birqatar qujatqa qol qoıylyp, birlesken kommıýnıke qabyldandy.
Sondaı-aq, Qazaqstannyń Qorǵanys mınıstri men Shanhaı Yntymaqtastyq Uıymynyń Bas hatshysy birlesken málimdeme jasady.