ShYU keńistigi jahandyq saýda damýynyń úlken eýrazııalyq beldeýi bola alady
ASTANA. KAZINFORM — ShYU keńistigi jahandyq saýda damýynyń úlken eýrazııalyq beldeýi bola alady. Bul týraly elordadaǵy Táýelsizdik saraıynda Shanhaı yntymaqtastyq uıymy sammıti aıasynda ótip jatqan «ShYU+» kezdesýinde Memleket basshysy Qasym-Jomart Toqaev aıtty.
«ShYU keńistigi jahandyq saýda damýynyń úlken eýrazııalyq beldeýi bolýǵa qabiletti. Qurlyqtyq birlestik retindegi bizdiń pozıtsııamyzdy nyǵaıtý ekonomıkalyq turaqtylyq men gúldenýdiń aıtarlyqtaı faktory qyzmetin atqarýy tıis. Qazaqstan — Eýrazııa kólik júıesiniń basty býyndarynyń biri sanalady. Elimiz arqyly Azııa men Eýropa arasyndaǵy qurlyqtaǵy tranzıttik tasymaldyń 80 paıyzy júzege asady», — dedi Prezıdent.
Memleket basshysy Qazaqstan «Bir beldeý, bir jol» megajobasy men Soltústik-Ońtústik dáliziniń Transkaspıı baǵytyn túıindestirý baǵytynda belsendi jumys júrgizip jatqanyn aıtty.
«Osynaý kólik kúretamyrlarynyń túıisýi qýatty mýltıplıkatıvti áser beredi. Osyǵan baılanysty seriktestik jeli, strategııalyq porttar men logıstıkalyq ortalyqtar qurý jónindegi bastamamyzdy is júzinde júzege asyrýǵa basa mán beremiz», — dedi Qasym-Jomart Toqaev.
