ShYU qatysýshy elder qaldyqtardy tıimdi basqarý salasynda málimdeme jasaıdy
ASTANA. KAZINFORM – ShYU sammıti aıasynda qatysýshy elder ekologııa salasynda eki kelisimge qol qoıdy. Bul týraly Ekologııa jáne tabıǵı resýrstar mınıstri Erlan Nysanbaev aıtty.
Onyń sózinshe, birinshi qujat – qorshaǵan ortany qorǵaý salasyndaǵy yntymaqtastyq baǵdarlamasy.
«Ekinshi qujat – ShYU qatysýshy memleketter basshylary keńesiniń qaldyqtardy tıimdi basqarý salasyndaǵy málimdemesi. Bul jerde qazirgi ýaqytta barlyq elderde qaldyqtar máselesi óte ózekti bolyp otyrǵanyn túsiný kerek. Sondyqtan búgin osy ýaǵdalastyqtar sheńberinde biz – ShYU elderi osy problemalardy birlesip zerttep, tájirıbe almasatyn bolamyz. Búginde barlyq derlik elder qaldyqtardy tıimdi basqarady, olardan úırenetin nárse kóp», - dedi E. Nysanbaev ShYU sammıti kýlýarynda bergen suhbatynda.
Sonymen birge, Ekologııa mınıstri erekshe qorǵalatyn aýmaqtar salasyndaǵy yntymaqtastyqty damytý jóninde baıandady.
«Qazir biz tabıǵattyń qandaı orasan júktemelerge ushyraǵanyn kórip otyrmyz. Munda erekshe qorǵalatyn aýmaqtardy qurý jáne ShYU elderiniń osy másele boıynsha ózara is-qımyly óte mańyzdy. Bul bıoalýandyqty saqtaý máselesine de qatysty», - dedi ol.
Aıta keteıik, Qazaqstannyń Shanhaı yntymaqtastyq uıymyna tóraǵalyǵy sheńberinde 2024 jyl uıymnyń Ekologııa jyly bolyp jarııalanǵan bolatyn.
ShYU Bas hatshysy Chjan Mın Kazinform agenttigine bergen suhbatynda Uıymǵa múshe memleketterdiń ekologııalyq yntymaqtastyǵy, onyń keleshegi men qazirgi jobalary týraly aıtyp berdi.
Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.
Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty. El basshylaryn qarsy alý rásimi aıaqtaldy.
Belarýs ShYU-nyń tolyqqandy múshesi boldy. Shanhaı yntymaqtastyq uıymynyń sammıtinde múshe memleketterdiń basshylary Belarýs Respýblıkasyn Uıym múshelegine qabyldaýǵa qatysty birqatar qujatqa qol qoıdy.
Shanhaı yntymaqtastyq uıymy halyqaralyq qatynas júıesiniń mańyzdy tetigine aınaldy. Bul týraly sammıtte Memleket basshysy Qasym-Jomart Toqaev aıtty.
