ShYU-ǵa múshe elderde terrorıstik uıymdardyń 280-nen astam oshaǵy anyqtalǵan
TAShKENT. KAZINFORM – Búgin Tashkentte Qytaıdyń tóraǵalyǵymen Shanhaı Yntymaqtastyq Uıymynyń Óńirlik terrorızmge qarsy qurylym (ShYU ÓTQQ) keńesiniń 41-shi otyrysy ótti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Otyrysqa Úndistan, Iran, Qazaqstan, Qytaı, Qyrǵyzstan, Pákistan, Reseı, Tájikstan jáne Ózbekstannyń quzyretti organ ókilderi men ShYU ÓTQQ Atqarýshy komıtetiniń delegattary qatysty.
Onyń barysynda ShYU Óńirlik terrorızmge qarsy kurylymynyń keńesi 3 qańtarda Irannyń Kerman qalasynda, 22 naýryzda Reseıdegi «Krokýs Sıtı Holl» ǵımaratynda jáne 26 naýryzda Pákistannyń Haıber-Pahtýnhva provıntsııasynda bolǵan terrorlyq aktilerdi qatań aıyptap, málimdeme jasady. Tıisinshe, qatysýshylar lańkestik áreketterdiń qurbandaryn bir mınýt únsizdikpen eske aldy.
Otyrys aıasynda atalǵan uıymnyń keıingi birneshe jylda atqarǵan jumysynyń qorytyndysy shyǵarylyp, qazirgi tańda týyndap jatqan qaýipterge saı kún tártibindegi máseleler qaraldy.
«Keıingi 3 jylda uıymǵa múshe memleketterdiń ókiletti organdary jáne Óńirlik terrorızmge qarsy qurylymnyń kúshimen halyqaralyq terrorıstik uıymdardyń 280-nen astam oshaǵy anyqtalyp, olardyń joly kesildi. Sondaı-aq, aınalymnan 7,5 myń qarý shyǵarylyp, jarylǵysh zattar alyndy. 225 myń túrli oq-dáriler tárkilendi jáne terrorızm, separatızm, ekstremızmdi nasıhattaǵan 320 myńnan astam saıt buǵattaldy», - dedi ShYU ÓTQQ Atqarýshy komıtetiniń dırektory Rýslan Mırzaev.
Otyrysta birqatar qujatqa qol qoıyldy jáne Qazaqstan usynǵan ShYU-ǵa múshe elderdiń aýmaǵyndaǵy beıbitshilikke qaýip tóndiretin jaǵdaılarǵa qarsy birlesken is-qımyldar sharasy bekitildi.
«Qazirgi geosaıası turaqsyzdyq bizdiń birlestigimizge degen ózge elderdiń qyzyǵýshylyǵyn arttyra tústi. Uıym qyzmeti barysynda baıqaýshy memleket mártebesin alýǵa - 10, al dıalog boıynsha seriktes mártebesin alýǵa 20 ótinish kelip tústi. ShYU óz jumysyn alty múshe memleketpen bastap, búginde 26 eldi biriktirgen úlken «otbasyǵa» aınaldy. Qazirgi ýaqytta uıymǵa Taıaý Shyǵys, Soltústik Afrıka, Ońtústik jáne Ońtústik-Shyǵys Azııa elderiniń qyzyǵýshylyǵy basym», - dedi ShYU Bas hatshysynyń orynbasary Nurlan Ermekbaev.
Sonymen qatar, basqosýda aldaǵy kezeńge arnalǵan josparlar talqylandy. Máselen, ShYU-ǵa múshe memleketter shekara qyzmetteriniń «Yntymaq – 2024» birlesken shekara operatsııasyn ótkizý kózdelgen.
Otyrys sońynda mamandar ShYU ÓTQQ-nyń kezekti otyrysyn Qytaıda ótkizýge ýaǵdalasty.
