ShYU-ǵa daıyndyq: kimderge qashyqtan jumys isteý usynyldy

ASTANA. KAZINFORM - 3-4 shildesinde Shanhaı yntymaqtastyq uıymynyń sammıti kezinde elordada qaýipsizdik sharalary kúsheıtiledi. Bul týraly qala ákimdigi habarlady.

«Azamattarǵa yńǵaıly bolý úshin ásirese joldarda keptelis bolmas úshin 2-4 shilde aralyǵynda memlekettik mekemelerge jáne kvazımemlekettik sektorlarǵa qyzmetkerleriniń 70%-yna deıin qashyqtan jumys isteý formatyna aýystyrý usynylady», - delingen habarlamada.

Eske sala ketsek, 3-4 shilde kúnderi Astanada balabaqshalar jumys istemeıdi.

«Bul – iri halyqaralyq is-sharalardy ótkizý barysynda kúsheıtilgen qaýipsizdik sharalary qabyldanatyn jáne azamattarǵa yńǵaıly bolý úshin ishinara qashyqtan jumys isteý tártibi engiziletin álemdik tájirıbe», - deıdi ákimdik.

Aıta keteıik, ShYU sammıti Astanada 3-4 shildede ótedi.

Onda ShYU-ǵa múshe memleketterdiń basshylary saıası, saýda-ekonomıkalyq jáne mádenı-gýmanıtarlyq ózara is-qımyldyń ózekti máselelerin talqylaıdy.

Forýmǵa baıqaýshy elder kóshbasshylary men dıalog boıynsha seriktester de qatysady dep josparlanyp otyr.