ShYU elderiniń joǵary bilim salasyndaǵy yntymaqtastyǵy týraly kitap jaryq kórdi
ASTANA. KAZINFORM – Týyndynyń tusaýkeser rásimine ShYU-ǵa múshe elderdiń joǵary oqý oryndarynyń basshylary qatysty.
Búgin Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» taqyrybynda halyqaralyq sımpozıým ótti.
Jıyn barysynda «ShYU-ǵa múshe elderdiń joǵary bilim salasyndaǵy halyqaralyq yntymaqtastyǵy» atty kitaptyń tusaýy kesildi.
Jınaqta uıymǵa qatysýshy elderdiń bilim-ǵylym, halyqaralyq yntymaqtastyq salasyndaǵy ortaq tabystary men birlese atqarǵan jumysy orys, aǵylshyn, qytaı tilinde baıandalǵan.
Aıta keteıik, halyqaralyq sımpozıým jumysyna jáne kitapty tanystyrý rásimine QHR Bilim mınıstri Hýaı Tszınpen, QR Ǵylym jáne joǵary bilim mınıstri Saıasat Nurbek, Jibek joly ýnıversıtetteri alıansynyń hatshylyǵy, Ál-Farabı atyndaǵy Qazaq ulttyq ýnıversıtetiniń basqarma tóraǵasy – rektory Janseıit Túımebaev, Sıan Tszıaotýn ýnıversıtetiniń rektory Chjan Lıtsıýn, Astana IT ýnıversıtetiniń rektorynyń mindetin atqarýshy Serik Ómirbaev jáne 20 joǵary oqý ornynyń rektorlary qatysty.
Atalǵan shara barysynda Qytaı Bilim mınıstri Hýaı Tszınpen ShYU elderinde bilim salasyn damytý boıynsha úsh usynys aıtqan bolatyn.
