ShYU elderiniń jalpy ishki ónimi álemdik kórsetkishterden joǵary

ASTANA. KAZINFORM — Dúnıejúzilik banktiń málimetinshe, ShYU elderiniń jalpy ishki ónimi 2023 jyldyń sońynda 24,5 trln dollar nemese álemdik JІÓ-niń 24 paıyzyn quraǵan.

Ulttyq ınvestorlar qaýymdastyǵy Telegram arnasynyń málimetinshe, Qytaı JІÓ-niń negizgi úlesi — álemdik jalpy ishki ónimniń 17,79 trln dollaryn (16,88%) alady. Odan keıingi orynǵa Úndistan (3,55 trln dollar, 3,37%) jaıǵasqan. Sondaı-aq, Reseı — $2,02 trln (1,92%), Iran — $0,4 trln (0,38%), Pákistan — $0,34 trln (0,32%), Qazaqstan — $0,26 trln (0,25%), Ózbekstan — $0,09 trln (0,09%), Qyrǵyzstan jáne Tájikstannyń jalpy ishki ónimi sáıkesinshe $0,01 trln (0,01%) teń keledi.

Osylaısha ShYU elderiniń jalpy ishki ónimi álem elderinen áldeqaıda joǵary qarqynmen damyp kele jatqanyn atap ótken jón. Mysaly, Úndistanda 2023 jyly JІÓ ósimi — 7,6%, Qytaıda — 5,2%, Qazaqstanda — 5,1%, Ózbekstanda — 6%, Qyrǵyzstanda — 6,2. 

Álemdik JІÓ-niń ortasha qarqyny - 2,7%, al EYDU elderinde - 1,7% ekenin eskersek, ShYU elderiniń jalpy ishki ónimi birden nazar aýdartady.

Ótken jyly Qazaqstannyń ShYU elderimen taýar aınalymy shamamen 66 mlrd dollarǵa jetken. Bul — bes jyl burynǵy kórsetkishten 56,5 paıyzǵa artyq.

Qytaı shamamen $41 mlrd kórsetkishpen (eldiń jalpy taýar aınalymynyń 30%-ǵa jýyǵy) ShYU elderi arasyndaǵy Qazaqstannyń eń iri saýda áriptesi bolyp qala beredi.

Demografııalyq statıstıkaǵa kóz júgirtsek, ShYU-ǵa múshe elderde 3,1 mlrd adam nemese planetanyń jalpy halqynyń 42,2 paıyzy turady. Onyń ústine ShYU elderin dúnıe júzindegi jumys kúshiniń 1,5 mıllıardy (álemdegi jalpy jumys kúshiniń shamamen 20%) meken etip otyr.

Bir qyzyǵy, ShYU-ǵa múshe memleketterdiń jalpy aýdany 34 mln sharshy shaqyrymnan asady. Bul — Eýrazııa qurlyǵynyń 60 paıyzynan astam.