ShYU elderinen Qazaqstanǵa kelgen týrıster sany 14,8 mln adamǵa jetti
ASTANA. KAZINFORM - Bishkekte Shanhaı Yntymaqtastyq Uıymyna (ShYU) múshe memleketterdiń týrıstik ákimshilikteri basshylarynyń kezdesýi ótti. Іs-sharaǵa Qazaqstan Respýblıkasynyń Týrızm jáne sport mınıstri Erbol Myrzabosynov qatysyp, týrızm salasyndaǵy óńirlik yntymaqtastyqty damytýǵa qatysty Qazaqstannyń tásilderin usyndy.
Mınıstr qyrǵyz tarapyna jyly qabyldaǵany men kezdesýdi joǵary deńgeıde uıymdastyrǵany úshin alǵys aıtyp, uıymǵa múshe elder arasyndaǵy syndarly dıalogtyń mańyzyn atap ótti.
Erbol Myrzabosynov Qazaqstan ShYU aıasynda týrızmdi ekonomıkalyq ósim men óńiraralyq ıntegratsııany nyǵaıtýdyń mańyzdy baǵyty retinde qarastyratynyn jetkizdi.
2025 jyldyń qorytyndysy boıynsha ShYU elderinen Qazaqstanǵa kelgen týrıster sany 14,8 mln adamǵa jetti.
Ózara saparlardyń basym bóligi Ózbekstan, Qyrǵyzstan, Reseı jáne Qytaı elderine tıesili. Sonymen qatar Úndistannan keletin týrıster sanynyń turaqty ósimi baıqalady. Bul týrıstik geografııanyń keńeıip, óńirlik baılanystardyń nyǵaıyp kele jatqanyn kórsetedi.
– Búginde týrızm tek qyzmet kórsetý salasy ǵana emes, sonymen qatar ekonomıkanyń damýyna, ınvestıtsııanyń artýyna, ınfraqurylymnyń jańarýyna jáne jańa jumys oryndarynyń ashylýyna yqpal etetin mańyzdy draıverge aınaldy. Qazaqstan ShYU aıasynda ortaq týrıstik keńistik qalyptastyrý bastamasyn qoldaıdy jáne tájirıbesimen bólisýge, sondaı-aq seriktes elderdiń ozyq tájirıbesin qabyldaýǵa daıyn, – dedi mınıstr.
Vedomstvo basshysy Qazaqstanda sátti júzege asyrylyp jatqan birqatar bastamany tanystyrdy. Atap aıtqanda, daǵdarys jaǵdaılarynda týrısterdi elge qaıtarýdy qamtamasyz etetin «Týrıstik Qamqor» qory, sondaı-aq sheteldik qonaqtardy onlaın tirkeýge múmkindik beretin ári týrıstik aǵyndardy basqarýdyń tıimdiligin arttyratyn eQonaq tsıfrlyq júıesi atap ótildi.
Sondaı-aq mınıstr transshekaralyq týrızmdi damytý máselesine erekshe toqtaldy. Óńirlik yntymaqtastyqtyń tabysty úlgisi retinde Qazaqstan, Ózbekstan jáne Tájikstandy Uly Jibek joly boıymen baılanystyratyn halyqaralyq Jibek Joly týrıstik poıyzynyń iske qosylýyn mysal retinde keltirdi.
Kezdesý qorytyndysy boıynsha Qazaqstan tarapy ShYU aıasyndaǵy yntymaqtastyqty birlesken týrıstik baǵyttardy damytýǵa, tsıfrlyq sheshimdermen almasýǵa jáne týrıster qaýipsizdigin arttyrýǵa baǵyttaýdy usyndy.
Osyǵan deıin ishki týrızmdi qalaı qoljetimdi ári sapaly etýge bolatyny týraly sarapshy pikirin berdik.
